Diaranson mainta durante un conferencia di prensa prome minister Mike Eman, hunto cu minister di Salud Mervin Wyatt-Ras y director di AZV, Edwin Jacobs, a anuncia e lista positivo di remedi nobo cu a drenta na vigor entrante 1 di mei 2025.

Prome minister Eman a splica cu durante e ultimo añanan nan a bin ta scucha hopi den comunidad di e dolornan cu ta pasa p a loke ta trata remedi. El a indica cu AZV semper ta cubri hopi di e cuido medico y hopi di e remedi, pero durante e periodo cu mester a haci cierto ahustacionnan remedinan a ser kita y den comunidad esaki a ser sinti como un peso hopi grandi. Hopi famia na momento cu nan bay busca nan receta a haya cu nan tin cu paga pa cierto remedinan cu anteriormente tabata ser cubri door di AZV.

E mandatario a sigui splica cu canando den e barionan nan mes por a scucha hopi di esey, y cu hopi di e remedinan cu ta ser duna tin biaha por parce secundario caminda un persona ta haya remedi pisa pa cierto di nan tratamento medico, ta haya tambe remedi pa cuida nan stoma for di e remedi cu nan ta haya y e hopi di e remedinan aki no tabata ser cubri mas, y tambe cierto cremanan pa cierto alergia.

“Diferente di e remedinan aki tabata ser usa hopi den nos comunidad y tabata ser sinti como un peso grandi ora cu mester a paga pa esaki, specialmente esnan di menos recurso tabata pasa hopi dolor. Nos a tende di boticarionan cu ta bisa cu tin biaha personanan ta yega busca nan remedi y ora nan tende cu nan tin cu paga pa un, sea nan ta rabia hopi of nan tabata laga e remedi atras y esey tabata preocupa nos mas pasobra nos sa cu un dokter no ta bay prescribi algo si bo no mester di dje y si bo lag’e atras esey kiermen bo no ta hayando e tratamento manera debe ser y esey por tin consecuencianan pa e persona,” el a remarca.

Prome minister Eman a indica cu nan a drenta den combersacion cu director di AZV pa mira kico por haci, ki espacio tin pa por trece e remedinan back. El a menciona cu nan a scucha tambe na momento di formacion for di dokter y specialistanan, tur e asociacionnan cu tin di haber cu cuido medico na Aruba y practicamente tur tabata di acuerdo cu mester trece back hopi di e remedinan aki y awor e decision a yega AZV caminda cu gran parti di e remedinan cu a ser kita ta bini back.

El a agrega cu tin remedinan cu no tabata ser hopi usa, of no tabata ser usa cu no tabata necesario pa pone back, pero practicamente tur e remedinan cu ta ser usa y ta ser prescribi ta back riba e lista positivo di AZV.

Di su banda minister di Salud Mervin Wyatt-Ras a expresa cu tabata un momento special y di gran emocion pa tin e lista positivo atrobe adapta, y cu ta na mas beneficio di pueblo.

“Nos a lucha duro. Nos historia ta largo den parlamento pa asina logra esaki. Na 2021 den luna di april a austerisa e lista aki, y nos a protesta energicamente y a logra cu na mei di e mesun aña a pone e remedi back riba e lista. Despues atrobe na aña 2022 na mei, a bolbe austerisa e lista aki y tabata un medida hopi grandi pa nos pueblo,” el a enfatisa.

El a indica cu ciudadanonan ta keha continuamente, specialmente esnan cu no por paga nan medicina. E personanan aki tabata yega na botica y ora cu nan tende cu nan tin cu paga, nan no por a paga door cu no tabatin placa y esey tabata causa dolor den pueblo.

“P’esey nos tin e compromiso pa asina haci algo na esaki y cu cooperacion tambe cu AZV y cu prome minister y tur e profesionalnan cu a traha riba esaki, nos hendenan ta haya nan medicina back. Nos mester di esey y manera cu nos a priminti, y nos ta cumpli tambe cu pueblo. E ta un logro hopi grandi pa nos, aunke kizas e ta mustra cu e no ta grandi, hopi grandi pa nos,” minister Wyatt-Ras a enfatisa.

Pro ultimo director di AZV, Edwin Jacobs, a indica cu e organisacion a premira cu esaki ta bin na caminda, specialmente despues cu a constata cu e recuperacion economico a trece un entrada hopi grandi pa AZV. “Nos ta sinti cu for di e mundo politico tabata biba e deseo pa cu esaki tambe y nos tabata premira cu esaki ta bin na caminda y awor e ta un realidad,” el a subraya.

El a splica cu gran parti di e remedinan cu AZV a conseha na 2021 pa elimina den cuadro cu e recorte di 60 miyon cu mester a corta den gasto medico, aworaki tin espacio y ta na su luga pa duna back y ehecuta e decision di gobierno.

Jacobs a agrega cu comparando e AZV di prome cu pandemia y e AZV aworaki, el a splica cu prome cu pandemia ora di analisa datos nan tabata mira cu cierto caminda tabatin cierto uso excesivo, pero e momento ey nan no tabata den condicion pa controla esey inmediatamente. Pero ultimo dos aña e organisacion a inverti den e departamento di declaracion y apoderacion cu data analitico y inteligencia artificial por monitorea unda e comportamento di prescrpicion no ta den liña cu loke ta ser spera medicamente y asina por atende cu e dunador di cuido pa e wak kico ta pasando, locual anteriormente no tabata posibel.