Ayera mainta durante un conferencia di prensa, prome minister Mike Eman (AVP) a comparti informacion tocante e ultimo desaroyonan relaciona cu e tempo cu tin actualmente den region. Gobierno di Aruba, conhuntamente cu Departamento Meteorologico Aruba (DMA) y Crisis Management Office (CMO), ta keda vigilante y ta coordina e desaroyo di tormenta tropical Melissa, un sistema cu recientemente a forma den lama Caribe y cu lo por tin efectonan indirecto riba e isla den proximo dianan.

Manera ta conoci durante fin di siman, autoridadnan meteorologico a duna ​​actualisacion continuo riba e desaroyo di e sistema a traves di varios plataforma. Segun e ultimo informe, alrededor di 11or di mainta dialuna, e disturbio den Caribe a alcansa e status di tormenta tropical y a haya e nomber oficial di Melissa. E centro ta situa cerca di 14.3 grado noord y 71.7 grado west, panort loke ta pone na un distancia considerabel di Aruba. Sinembargo, efectonan asocia, manera awasero pisa, strena y lamper, biento fuerte y olanan fuerte por ser experiencia riba e isla.

Prome minister Eman a recorda cu experiencia historico cu tormentanan den cercania ta mustra cu hasta sin un impacto directo, e efectonan secundario por ta significante. Hasta cantidadnan modera di awasero a yega di causa inundacion repentino na varios area di e isla. El a menciona cu na Corsou, por ehempel, dialuna a registra acumulacionnan di mas cu 90 milimeter di awa, mientras cu na Aruba ya a observa inundacion den areanan vulnerabel cu solamente 5 pa 10 milimeter.

Pa e motibo aki, Departamento Meteorologico Aruba ta urgi publico pa keda alerta pa e posibilidad di yobida prolonga, biento fuerte, y lama bruto. Doñonan di boto mester tene cautela special, ya cu condicionnan riba lama por bira peligroso pa motibo di aumento di ola y coriente. Ta anticipa cu e proximo dianan lo por ta marca pa awasero pisa compaña pa lamper, strena y biento fuerte, cu ta efectonan tipico di e tipo di sistema tropical aki.

Mientras tanto, tormenta tropical Melissa ta sigui fortalece riba awanan cayente di Caribe y ta mantene un trayectoria nort den e region, den direccion di Republica Dominicana y Haiti. Modelonan di tempo ta indica cu e por intensifica y alcansa status di horcan den e proximo dianan. Aunke cu Aruba no ta den e liña directo di impacto, e cola pariba di e sistema lo por sigui genera instabilidad atmosferico den bisindario di e isla.

Segun Departamento Meteorologico Aruba, bientonan ta sigui core for di zuid y zuidoost, impulsa pa sistemanan desaroyando riba Lago Maracaibo y e Peninsula di Paraguana na Venezuela. Esaki por genera cubrimento di nubia denso y strena cu de bes en cuando ta yega Aruba.

Prome minister Eman a informa cu pa loke ta preparacion, Departamento di Obra Publico (DOW) a indica cu e tin tres pomp di extraccion activo disponibel pa uso den caso di inundacion, specialmente den areanan cu ta propenso pa inundacion rapido. Coordinacion entre DOW, CMO, y Departamento Meteorologico Aruba a keda continuo durante henter weekend, garantisando un contesta rapido na cualkier eventualidad.

E mandatario a remarca cu inundacion ta keda un di e problemanan principal durante periodonan di yobida na Aruba y un preocupacion den comunidad. Den hopi caso, drenahe natural ta tuma varios ora pa baha e nivel di awa, loke por causa problema di trafico y afecta cas y negoshi. P’esey autoridadnan ta ripiti e importancia di sigui recomendacionnan oficial y evita exposicion innecesario na condicionnan peligroso.

Prome minister Eman a indica cu Gobierno di Aruba a mantene comunicacion continuo cu Departamento Meteorologico Aruba pa evalua e posibilidad di suspende scol ayera. Despues di a analisa e pronosticonan extensivamente, a determina cu e condicionnan no tabata exigi ciere di scol. E decision tabata basa riba datonan actualisa cu ta confirma cu e yobidanan spera lo no a forma un riesgo significante durante mainta. Finalmente, e pronostico a resulta corecto, y actividadnan por a sigui manera normal.

No obstante, Gobierno a dicidi di tene un conferencia di prensa pa tene comunidad informa tocante e comportamento di e sistema tropical y e medidanan preventivo na su luga. Departamento Meteorologico Aruba lo sigui actualisa su pronosticonan frecuentemente. Ta urgi comunidad pa vigila anuncionan oficial y actua cu cautela mientras tormenta tropical Melissa ta sigui move den Caribe.

Diabierna ultimo, Gobierno di Aruba a yama un conferencia di prensa pa duna e prome informacion tocante un posibel disturbio of mal tempo den Atlantico cu ta moviendo den direccion west.

Prome minister Eman a bisa e momento ey cu nan a ricibi hopi pregunta tocante “un sistema cu tin na e momentonan aki den Atlantico, un sistema cu diferente di e instancianan ta pronostica cu segun cu e dianan ta bay por desaroya su mes den un tropical wave, y pa e motibo ey nos a haya importante pa informa nos comunidad kico ta e sentimentonan di Meteorologische Dienst na e momentonan aki.”

El a indica cu departamentonan di gobierno tabata haciendo algun trabao di mantencion den diferente area di nos isla, entre otro Bubali, San Miguel y Keito pa evita cu acumulacion di awa por bay causa posibel molester. “Pa e areanan sigur di San Miguel nos ta bezig ta monitoria e nivel di awa den Bubali Plas, y eynan nos ta tumando precaucionnan, cu si mester en todo caso lo regula e nivel. Nos tin un tiki espacio awo pa locual ta trata e awa mas limpi, na e parti ariba di Bubali Plas, pa por maneha tambe e nivel di loke ta Bubali Plas.”

Tocante preparacionnan pa temporada di yobida, e mandatario a bisa tambe cu DOW tin algun luna caba ta preparando e rooinan y afvoersysteem, y cu ta tumando precaucion ya cu actualmente ta den temporada di horcan y tabata kier prepara pa cualkier eventualidad cu por tin. Tambe el a bisa cu hunto cu CMO a prepara un plan pa atende por ehemplo cu e falta di capacidad pa pomp awa, ya cu na Aruba ora di awasero ta yena hopi lihe cu awa, y ta afecta lugarnan sensitivo tambe manera casnan di cuido, scol, etc.

Prome Minister Eman a bisa ademas cu “Aruba ta prepara” pa un potencial horcan, y pa atende yamada di comunidad cu mester ayudo den caso di un calamidad. El a bisa cu ta evalua e grado di emergencia pa cada yamada pa determina nan urgencia pa ricibi prioridad, ya cu no por atende tur yamada cu mesun velocidad. Pero el a bisa cu tin un sistema pa atende tur e informacion cu por yega y dirigi e instancianan cu tin cu mobilisa pa atende cu e emergencia.

Pa loke ta un potencial blackout, unda comunicacion ta interumpi, prensa a puntra tocante posible shelter, pakico no ta informa di un localidad di manera adelanta, ya cu si tin interupcion den comunicacion, lo bira dificil pa hende sa unda pa bay pa shelter. E mandatario a bisa cu na e momento aki ainda no ta sigur cu e sistema di tempo lo por crea un problema pa Aruba, y pues no a considera ainda cu ta momento pa prepara shelter.

El a remarca riba e importancia di anticipa e informacion na comunidad. Teniendo na cuenta e diferente publicacionnan cu ta awendia na alcance di comunidad, ta na su luga pa duna e comunidad e contexto cual tin cu mira e pronostico di tempo.