Pa un tempo largo Fundacion Lisette Gomes ta ricibiendo tur tipo di yamada pa problema social cu ta yega cerca nan cu desesperacion pa ayudo y nan ta wak situacion y yuda di e forma cu nan por. Ta pidi colaboracion di comunidad pa un famia cu ta biba den situacion deplorabel.

Gomes mes ta duna di conoce cu como ser humano nan no por bisa no na duna yudansa na esnan cu mester. Sinembargo ta analisa e situacion. “Nos ta wak e situacion di e persona pa wak si ta cobra onderstaand of traha of ken ta bisa den e cas.”

Nan ta analisa hunto cu nan trahado social. Nan a yega na un otro caso. E caso ta uno ‘tristo di un mama cu su yiu menor di edad’. E famia ta bibando den un situacion inhumano pasobra como hende no por biba den un cas deplorabel.

Maltrato pisa cu a conduci na depresion.
El a bisa cu e porta di e cas ta kibra unda cu bestia ta drenta. “Tin awa cu coriente si, pero nan no tin stoof. Practicamente nan no tin casi nada. Situacion a yega asina leu pa motibo cu e señora den pasado a perde su trabou. E tabata biba un bida hopi dificil cu su ex pareha, hopi maltrato y el a cay den deprsion pisa cu a pone cu cosnan a bira pio.”

Pa varios luna e muhe ta buscando un trabou pero proceso ta andando. E ta registra na DPL y nan ta bezig cune, sinembargo e ta bisa cu no por haya di un dia pa otro trabou facil. Gomes tambe ta expresa mirando cu tin un menor di edad involucra y e fundacion ta para mastanto pa mucha ‘nos no por para keto’.

E placa cu ta haya yudansa p’e ta pa paga awa y coriente. Tambe algun otro cosnan pero no ta yega pa henter e luna. Gomes ta bisa cu e famia ta pasa hamber.

Pa locual ta trata trabou, e señora ta dispuesto pa haci cualkier trabou pa asina e por tin su entrada. Gomes ta comparti cu e señora a cay den un depresion pisa. E ta bisa cu e mester un push. E ta bisa cu tin speransa pa por cuminsa di nobo y duna su yiu un calidad di bida miho.

Berguensa pa pidi ayudo.
A puntra Gomes si e persona a busca ayudo na Departamento di Asunto Social. E ta expresa cu el a bati na porta pa onderstaand pero ‘pa ta sincero Arubiano tin tendencia di ta orguyoso y tin mucho berguensa pa pidi ayudo’.

“E señora tin berguensa, e tabata dificil pa papia cu nos mes. Otro persona cu conoce a bisa nos pa wak e situacion pa nos mes, pasobra e como hende mes a bisa no por drumi di wak e persona den un situacion asina”, el a expresa.

A haya e señora nervioso, sinembargo henter e proceso a cuminsa cana y tanten e cana tin un lista di espera pa e haya ayudo. Pero nan kier keda pusha pa asina e señora hunto cu su yiu por stabilisa y asina wak kico mas ta bay pasa.

Pa locual ta trata ayudo, Gomes a bisa cu mester varios porta cu ta falta y bentana. Tur esey nan tin e midinan. Tambe cualkier producto di cuminda di bleki tanten nan haya un frishider cu ta yuda. E señora ta cushina via un ‘slow cooker’ pa cual coriente ta bin halto.

Gomes ta bisa cu e situacion ta tristo pa cualkier persona cu kier yuda por tuma contact na Facebook pa e fundacion Lisette Gomes. Nan por yama na 5629820/ 5661345.

 

LEAVE A REPLY

Please enter your comment!
Please enter your name here