(AP) – Autoridadnan na Grecia ta bisa cu mas di 1,200 migrante a keda deteni riba e isla di Crete y e isla chikito cercano Gavdos durante e ultimo 3 dia, despues di un aumento den yegada for di Libia.
E wardacosta a bisa cu varios boto a keda intercepta cerca di Crete su costa for di diasabra te dialuna, causando cu oficialnan regional a pidi asistencia adicional di gobierno.
E aumento den yegada a coincidi cu un bishita di Grecia su minister di exterior, Giorgos Gerapetritis, ken a bay Libia pa dialogo cu ambos e gobierno internacionalmente reconoci y e administracion rival, den medio di esfuerso pa atende e crisis di migracion creciente y disputa di frontera maritimo.
Vocero di gobierno Pavlos Marinakis a bisa cu patruyahe di wardacosta y departamento naval den e region ta probable di intensifica. El a agrega cu aproximadamente 8,000 migrante a yega Crete desde comienso di e aña aki.
“E ta un problema serio y extremadamente compleho. Crete y su residentenan ta bao peso significante,” Marinakis a bisa. “Nos ta spera cu tur e esfuersonan diplomatico lo tin fruto. Di otro manera, nos lo keda forsa adopta medidanan di escala mas grandi y estricto pa garantisa cu e pais ta proteha.”
Migrantenan tipicamente ta haci e biahe di 350 kilometer na Crete den botonan cu no ta confiable – hopi biaha construi den pura pa sobrevivi un solo biahe of den barconan bandona cu ta modifica.
Gavdos, un isla chikito cerca di Crete, a keda abruma pa e yegada. Botonan y hermentnan pa salba bida ta termina na su lamanan, varios di nan accesible solamente na pia.
Na un di e lamanan remoto, David, un migrante di Sur Sudan, a sinta cu 5 otro mientras nan tabata descansa prome cu dicidi kico lo haci.
