(AP) – Studiantenan y miembronan di grupo di conservacion tabata celebra mientras 3 turtuga di lama rescata, ken ta den peligro di extincion den e parti aki di mundo, tabata bayendo back oceano na un lama priva den Nigeria su punto economico, Lagos.
Simannan despues cu e turtuganan a ser rescata for di piscadornan, nan a ser lansa back den oceano, birando e dozijn mas recien di turtuga di lama salba pa Greenfingers Wildlife Conservation Initiative den añanan recien. E grupo aki a ser laga den libertad fin di siman atras.
“Pa piscadornan, nan ta djis cuminda,” Chinedu Mogbo, fundador di e grupo Greenfingers a conta The Associated Press. “No tin conocemento aya fo di bida salbahe.”
Turtuga di lama, conoci pa e rol critico den e ecosistema marino, ta den peligro di extincion na Lagos, un ciudad na e costa cu mas di 20 miyon persona den su poblacion. No tin cifra di e poblacion di turtuga di lama cu ta resta den awanan di Lagos, sinembargo conservacionistanan manera Mogbo ta papia di un disminucion alarmante den e cantidad di turtuga di lama cu ta bay costa pa pone webo.
Nigeria, e cas di un abundancia di bida salbahe, tin 23 especie den “peligro di extincion critico,” segun International Union for Conservation of Nature.
E nacion West Africano tambe ta un punto di trafico ilegal di bida salbahe, cual expertonan ta bisa ta impulsa pa presionnan di e crecemento di poblacion y un falta di conscientisacion tocante e bestianan. “Nigeria su bida salbahe ta enfrenta un menasa andando y sumamente critico, net na punto di un collapse irreversible di e biodiversidad,” Mark Ofua, representante di West Africa pa Wild Africa a bisa.
