trahado ilegal y proteccion social.jpg

E fenomeno di trahadonan sin proteccion social cu no ta registra na Banco di Seguro Social(SVb), no tin di haber exclusivamente cu e trahadonan di afo, cu mester di un permiso di trabou for di Dimas. Sino cu e ultimo desaroyonan a mustra cu un grupo di trahado local cu tampoco tabata sigura na SVb, tambe ta halto.

“Locual ta mas sorprendente ainda ta e gruponan di trahadonan local cu no ta traha proteha”, asina director di SVb, sr. Edwin Jacobs a declara na Bon Dia Aruba.

Riba e grupo aki SVb  no tin ainda un bon calculacion di cuanto nan ta, ya cu nan ta un grupo den un “area shinishi” cu bo no ta mira. Aworaki SVb ta bay haya un bista con leu nos mercado laboral tabata cumpli cu nos trahadonan pa loke ta trata proteccion social.

Sr. Jacobs ta kere cu pa final di e luna aki of otro luna e cifranan di trahadonan cu a registra ta bay stabilisa, y asina SVb  por haya un miho bista di e cantidad nobo di trahadonan registra, teniendo cuenta cu proyeccion di nan entradanan y nan gastonan. 

Cu e cambio den e ley di seguro di malesa y accidente cu parlamento a introduci na luna di april y cu a drenta na vigor e luna aki, y cu a bin cu e instrumento di boet, SVb ta bay atende cu e fenomeno di trahadonan sin proteccion social. 

LEAVE A REPLY

Please enter your comment!
Please enter your name here