(AP) — Centenares di Guatemalteco a sali for di varios punto di e capital ayera pa protesta e supuesto corupcion di un gobierno profundamente impopular, e costo halto di bida, y atakenan contra libertad di expresion.
Studiantenan di universidad, facultad y otro empleadonan a marcha for di campus di e unico universidad publico den e capital, cargando borchinan exigiendo salida di e coruptonan. “Si no tin husticia pa pueblo, laga no tin paz pa gobierno!”, un borchi tabata bisa.
Presidente Alejandro Giammattei a ricibi critica pa bolbe nombra Procurador General Consuelo Porras, kende a ricibi critica di gobierno Mericano y otronan pa blokea investigacionnan di corupcion, y na su lugar, bay contra fiscal y huesnan cu antes tabata ehecuta e investigacionnan aki.
Mas recientemente, su oficina a aresta periodista ganador di premio di periodismo, Ruben Zamora, kende su corant El Periodico tin un reputacion pa investigacionnan riba corupcion, incluyendo contra Giammattei.
E manifestantenan tabata dirigi na e centro historico di Ciudad di Guatemala, e sede di poder. Lidernan di poblacion indigena Guatemalteco a join e protesta ayera tambe, advertiendo cu e costo halto di bida na e pais ta dañando e pueblo.
Enrique Saquic, un lider indigena for di Santa Lucia Utatlan, a bisa: “Nan ta horcando nos, nos rumannan, nos pueblo ta esnan cu ta sufriendo tur e costo halto di bida aki.”
Tambe el a nota cu co-optacion di sistema di husticia a laga Guatemalteconan indefenso.
Daniel Pascual, lider di Comite di Unidad di Agricultor, a bisa cu e costo di bida ta “nifica un aumento di hamber pa esnan di menos recurso”. “E corupcion na final ta hortamento di placa for di pueblo y esnan cu ta paga impuesto, y e pober y clase medio, pasobra e riconan no ta contribui igualmente na e pais”, Pascual a bisa.
Merca a sanciona Porras y a inclui su persona y otronan riba un lista di actornan na Guatemala cu ta representa un menasa pa democracia. Giammattei sinembargo a keda para su tras, nombrando e di nobo pa un segundo termino di cuatro aña e aña aki.
