Diadomingo pasa por lo menos 18 hende a muri den enfrentamento di gruponan rival na prison di Amazona, pa motibo di un guera declara entre dos di e bandanan principal di Brasil, manera Primeiro Comando di Capital di Sao Paulo y Comando Vermelho di Rio de Janeiro.
E prome combate a sucede na Penitenciaria Agrícola di Monte Cristo, na Boa Vista, capital di Roraima, luga cu tin frontera cu Venezuela y Guyana. Nan a bisa cu e conflicto a cuminsa durante ora di bishita, unda mas di cien hende tabata cera como rehen te momento cu e Batayon di Operacion di Polis a interveni pa negocia e liberacion di e hendenan aki.
Sin embargo, e resultado tabata cu 18 hende a muri, di cual 7 a keda decapita, otro 6 di nan a muri kima, y tabatin 8 persona cu herida menor.
E grupo di rebelde tabata tin hopi cuchiu y instrumento di palo cu nan a ranca di muraya y cu esey a decapita nan rivalnan, segun vocero di gobierno, Jessica Laurie, a bisa.
Entre tanto, ayera marduga a sucede otro motin den Penitenciaria Enio dos Santos Pinheiro, na Porto Velho, capital di Rondonia. Na e Penitenciaria aki integrantenan di Primeiro Comando di Capital di Sao Paulo a bringa cu integrante di Comando Vermelho di Rio de Janeiro.
Como resultado a muri mas prisonero pa motibo di asfixia pa kimamento di corchon den e celnan. E secretario di husticia di Rondonia, Marcos Rocha a informa cu mas di 40 prisonero cu tabata den e grupo menciona, a wordo transferi pa otro prison pa asina evita mas enfrentamento.
