editorial 2_15_1.jpg

Ultimo simannan nos por a presencia un fenomeno nobo: e afan pa informa pueblo! Den e pleito entre gobierno y AHATA tocante e ley di all-inclusive nos a custumbra caba pa mira casi diariamente aviso paga den corant y riba media digital, cu ta purba convence e publico di nan rason.

Na cada ken naturalmente ken nan kier kere, pero keto bay nan tur ta papia sin cu tin un estudio drechi haci na Aruba, en todo caso disponibel pa nos pa nos mes forma nos opinion. Straño ta cu ta purba convence hende, pero na mes momento ta mantene un filosofia di ‘no duna nan tur informacion si,  pasobra e ora nan ta bira wise riba bo”. Anto asina nos ta haya e tipo di mensahe  cu ta tuma luga ultimamente, pa cual algun of mas ‘guru’ di relacion publico ta haya bon pago pa conseha den tur esaki. E consecuencia di e guera publicitario no ta yega na nos conocemento, pasobra e ministro en cuestion tin un fuente casi interminabel di medio financiero disponibel (ATA), y den e caso di AHATA no ta nos asunto directamente pasobra ta nan placa. En todo caso pa aña 2015 ATA a entrega un cuenta anual positivo, unda a resta como 15 miyon florin pa duna gobierno como dividendo. Masha bunita, pero no ta riba esey mester husga trabao, mas bien con a uza e recursonan disponibel pa e tarea mayor cu ta mercadeo di Aruba como destino turistico. Y riba esey nos no por bisa nada positivo ni negativo pasobra nos transparencia cu tanto nos ta boga pe, no ta yega asina leu pa nos tin liber disposicion di e cuenta anual di e institucion. “So much for transparency’, nan ta bisa algun mil  miya panort di Aruba…

Pero pa bolbe na nos tema principal, guera di informacion, kico realmente ambos banda kier gana cu e metodo no nobo, pero mas bien no usual y riba tur cos, hopi caro. E echo cu un instancia ta saca tanto placa pa bombardia hende cu tin arte ni parte den e decision final, ta mustra cu toch ta haya importante no pa informa corectamente, pero pa haya un base di opinion faborabel. Di e banda di e ministro e ta mustra debilidad y  insiguridad di su mes, cu ta sali for di e mal trabao cu a haci cu preparacion di e ley. No ta pornada Raad van Advies a conseha pa no manda esey pa Parlamento pero e ministro ta haya importante pa tuma medida a corto plaso, pasobra segun e tin hotel cu ta para cla pa bende nan propiedad cu un siguiente doño cu ta cumpra cu e proposito di bay opera all-inclusive. Por ta berdad, of no. Di otro banda, e hotelnan cu ta protesta tin un punto cu e forma con kier yega na limita all-inclusive, ta toca curason di con ta haci negoshi pasobra e ministro concerni, ta haya un ‘say’ directo den nan operacion. En principio, esey ta un asunto di peso grandi y gobierno mester tin hopi bon argumento, no pa reglamenta e asunto, pero pa reglamenta esey di e manera aki.  Finalmente, esun para mas fuerte ta e ministro, cu tin diestres lacayo, perdon, diesdos lacayo na su disposicion pa vota na fabor di su ley . Sin embargo, den e tempo despues e lo mester bay ripara cu e daño den e relacion cu e hotelnan por ta hopi grandi, y por bira un obstaculo pa e mes opera como ministro. Pero na e momento aki esey ta parce algo di menor consideracion.

E otro ‘guera publicitario’ ta poco straño, pasobra e ta uno sin contrincante. E ministronan concerni a yega cas di nan trip di gloria na Venezuela, cu a duna nan e oportunidad di conta nan nietonan cu nan a logra mira interior di Palacio Miraflores, y a cuminsa cu un racha di sesion di informacion na comunidad, pa pone nan na altura di e logronan grandi di  e reapertura cu ta bay tuma luga pronto. Straño ta cu aparentemente parlamento no ta parti di e comunidad y nan lo ta ultimo pa haya sa algo. Pakico esey? Pasobra na parlamento awor no ta asina mas cu ta yega tira un discurso, presenta un powerpoint yen di imagen y cifra bunita y cla… Gobernacion ta papel y papel firma. Den e caso aki ta di suma importancia ta ken a firma kico – cual di e tanto CITGO nan –  y ta parce cu net esey gobierno, banda di su propaganda di ‘transparencia’ no kier pa nos sa. Felizmente nos no ta depende riba gobierno so pa haya informacion y nos si ta keda divulga e informacion ey pasobra p’esey nos ta prensa. Pero ta keda e pregunta pakico gobierno ta busca afanosamente pa crea sosten amplio pa nan plan cu e refineria. Nan no ta asina sigur di nan sosten den parlamento, despues di e salida di e presidente? Si ta 2000 pagina tin, na e altura aki nan mester por a copia un cuarta parti y duna nan…?

LEAVE A REPLY

Please enter your comment!
Please enter your name here