Guera mundial por… Cuminza na nos region…?

Pa varios siman caba nos ta den e tension causa pa e confrontacion entre Merca y Venezuela den lama di Caribe. Tabatin hopi speculacion caba kico esaki por significa y con grandi e problema por bira, no solamente pa e forzanan beligerante, sino pa nos como testigo sinta practicamente den e palco principal di e teatro di operacion. Sigur pa e islanan ABC motibo pa preocupacion, sigur si tene na vista con e tension ta sigui crece, fomenta pa ambos banda. Unpregunta clave a surgi caba: ta trata di combati narcotrafico o ta petroleo y otro riqueza natural Venezolano ta e obhetivo principal? Tin tur señal cu ta trata di un intento segun e guion antiguo di dominio imperialista, incluyendo derocamento di un regimen no di agrado di Washington y reemplazo di esaki pa uno talvez mas democratico, pero en todo caso mas cooperativopa cu interes economico strategico Mericano.E otro pregunta cu a keda: un conflicto grandi na Venezuela por conduci na un guera mas extenso, envolviendo mas pais y otro continente?

Pa cuminza cu e interesnan economico menciona; na e momento aki por tende comentario na Merca mes di e propio aliadonan di Trump cu ta e reservanan di petroleo mas grandi di mundo na Venezuela ta e obhetivo principal. Esey ta di comprende, pasobra e reservanan di petroleo, principalmente di ‘shale oil’, a yega na un ‘plateau’ caba. E produccion di mas di 13 miyon bari pa dia ta impresionante, pero no ta cubri tur necesidad di e pais, cu ta riba 20 miyon bari pa dia. Ademas gobierno di Trump a scoge strategicamente pa fuente di energia fosil y contra energia renovable, loke lo resulta den un busqueda mas extenso ainda di petroleo dentro y fuera di e pais. Ademas, e relacion perturba cu Canada ta resultando den un fluho menor di crudo pisa Canades pa Merca, loke ta fortifica e deseo di acceso na e otro potencial productor grandi di crudo pisa riba e continente, Venezuela.

E problema no ta solamente e manera anticua di dominio y usurpacion cu gobierno di Trump kiermaneha den e caso aki, sino cu esaki ta bay acompaña pa e filosofia di reparticion di mundo entre e podernan principal, unda tin solamente tres actor dominante: Rusia, Merca y China.Dentro di e manera di pensa aki lo ta logico pa spera di Rusia y China cu nan no ta ‘mete den asunto Mericano’. Lamentable pa Merca ya mundo no ta responde na e tipo di demarcacion aki. China por ehemplo tin varios decada di penetracion economico sin preocupa pa e inversionnan gigantesco cu Merca a haci den base militar pa sigura nan dominio na mundo. China, en todo caso por lo pronto, no tin mester di conflicto militar pa logra nan meta di dominio economico. Nan ta hacie via nan inversion biyonario den infrastructura na varios continente, tambe America, pa facilita comercio internacional den cual nan ta hunga un papel estelar.Rusia, di otro banda, ta un poder nuclear respetable, pero cu den casi cuatro aña di guera na Ucrania no ta parce capaz di duna sosten na un conflicto militar di mas duracion na por ehemplo Venezuela. E caso di e conflicto na Siria a mustra con debilita Rusia ta caba pa por opera leu di nan propio frontera. Esaki ta implica cu den e caso di Venezuela e apoyo a corto plazo por t’ey, pero Rusia lo no ta interesa, ni capaz den duna apoyo biyonario na un conflicto di varios aña na Venezuela.E mesun debilitacion catastrofico pa via di e guera na Ucrania lo limita tambe e posibilidad di agresion militar contra paisnan Europeo. Sin embargo, e mesun debilitacion aki ta causante di fragmentaciondi poder politico y economico na Rusia, loke por resulta den un implosion di e federacion Ruso, cu mas pueblo no Ruso declarando nan independencia y terminando den un caida di e pais cu e teritorio mas grandi na mundo, loke a sucede caba parcialmente na 1991 cu eliminacion di Union Sovietico. E caos cu por resulta di esey por ta preludio di accion agresivo no predicible, por ehemplo contra Europa. Esaki ta causando caba mayor vigilancia na e paisnan aki, aunke no na nivel di un conflicto mayor, sino di sabotahe di servicionan basico como acto di represalia.

Pero kico ta e efecto den nos region? Con e paisnan Europeo cu tin lazo cu cierto ex-colonia den region y otro pais cu lazo mas directo cu un pais Europeo, ta actua? Tin pais manera Trinidad & Tobago cu ta coopera cu Merca den e accionnan militar actual, pero esey no ta implica Reino Uni; Trinidad & Tobago ta independiente. Di e teritorionan Frances no tin tanto informacion, ademas nan ta bastante aleha di e zona di mayor peligro.Pa loke ta e teritorionan Hulandes, cerca di e posible candela, realmente nos no ta hayando otro señal for di Den Haag cu nan ta ‘preocupa’… Esey nos tabata ‘supone’ caba y nos tambe ta preocupa, ta pesey ta puntra.

No tur scenario den un conflicto belico na Venezuela lo afecta nos mescos. Por trata di un confrontacion di corto duracion cu pa algun tempo lo afecta nos, por ehemplo via paralizacion di aviacion den nos area, lokepor afecta parcial o completamente acceso pa turismo. Ningun hende no ta desea esey, pero mester contempla e posibilidad. E scenario mas dañino lo ta un invasion cu un poder militar considerable, resultando den un conflicto di varios aña, cu efecto desastroso pa e pais y e region. Con ta evita esey…?