Habana a celebra fin di politica “pies secos” na Merca

Cuba a aplaudi decision di Merca di elimina e politica migratorio cu tabata permiti, cu cualkier Cubano cu por yega na teritorio Mericano, por keda na e teritorio ey, y asina obtene su residencia legal. Cuba a califica e medida di Washington como decision inteligente pa tur dos nacion. E gobierno di ambos nacion a informa e fin di e politica conoci como “pies mojados, pies secos” (wet foot, dry foot) cu tabata permiti cualkier ciudadano Cubano cu por yega na teritorio Mericano keda na Merca, pero solamente si e no ser descubri pa autoridadnan di wardacosta riba lama. Tur ciudadano Cubano cu a ser gara of intercepta riba lama halto no tabatin acceso na e beneficio aki. “E politica migratorio aki tabata duna hopi problema pa seguridad di Cuba y Merca, pa seguridad di nos ciudadano cu tabata envolvi den trafico di persona, fraude migratorio, violencia, pasobra e politica aki, tabata duna aliento na pone nan bida na riesgo”, Directora General pa Merca di Ministerio di Relacion Exterior di Cuba, Josefina Vidal a bisa. “Cu e medida aki nos lo bay duna mesun trato cu nos ta duna na tur migrante cu a bin for di otro pais. E gobierno di Cuba a acepta ricibi ciudadano Cubano cu mester bolbe pa Cuba, como tambe acepta e regreso di migrante cu a ser intercepta riba lama”, el a bisa.

Vidal a resalta cu den e decision aki, Merca a elimina nan programa di “parole” tambe, cu tabata admiti profesional Cubano specialisa den area di salud cu por ta na un di tres pais, locual ta stimula emigracion di hopi ciudadano Cubano. Habana a resalta cu e proximo paso ta elimina e “Ley di Ahuste Cubano”, cu a ser aproba na Congreso di Merca den decada di aña 60, y cual ta otorga un trato special di refugiado na tur Cubano, bao di cual ta otorga residencia ora cumpli un aña na Merca. Donald Trump, proximo presidente di Merca por cambia e decision aki, ora cu e ta den e puesto di presidente otro siman. Trump a critica e medidanan di Obama cu e obheto di duna miho tratamento na relacion di Merca cu Cuba. Sin embargo e medida aki cu ta elimina e posibilidad pa hopi Cubano por yega na Merca sin un visa ta mesun linea cu e compromiso di Trump di impone medida migratorio mas estricto.
“Pies mojados, pies secos”, a ser aproba na 1995 pa presidente Bill Clinton, cu intencion di crea un politica migratorio mas liberal. Te na e momento ey tur Cubano cu tabata captura riba lama, cu tabata purba yega Merca, por a keda den e pais y despues di un aña obtene su residencia legal.

Kico ta nifica cu Obama a caba cu politica di “pies secos, pies mojados” y kico ta bay cambia cu e anuncio ey?

  • Termina e privilegio migratorio pa Cubano cu ta drenta di manera ilegal na Merca.
  • Cubano por drenta na Merca cu un visa valido so, ta aplica pa drenta via tera, lama o aire. Si no tin visa valido ta deporta nan.
  • Gobierno Cubano a acepta cu ciudadano Cubano cu orden di deportacion por bolbe Cuba. Mesun situacion pa tur Cubano cu por ser intercepta riba lama.
  • Ta elimina “programa di Admision Condicional pa profesional medico Cubano”.
  • Cubano cu ta na Merca caba no ta afecta pa e medida aki.
  • Ta continua vigente “Programa di Admision Condicional pa Reunificacion di Famia Cubano”
  • Merca ta continua cu programa “Loteria di visa”, den cual mas di 20.000 persona ta haya residencia legal.

 

 

 

 

You May Also Like

Hoben a choca su miho amiga mata despues di un selfie

Polis a uza un potret pa logra bin cu prueba riba un asesino cu ...

paho etienne.jpg

PAHO: Hopi pregunta sin contesta pa consecuencia di Zika cerca baby

Pan American Health Organization (PAHO), su director Dr. Carissa F. Etienne a indica durante ...

zika virus 2.jpg

WHO: Zika emergencia di salud internacional. Pero por biaha sin restriccion

Manera departamento di Salud diabierna ya a anticipa: WHO a declara Zika como un ...

Arubiano deteni na Merca relaciona cu homicidio

ORANJESTAD – E caso di un Rubiano bibando na Merca y envolvi den un ...

Alemania: Enfermero a mata mas cu 180 pashent

Un enfermero na Alemania cu a haya castigo di bida aña pasa pa a ...

alexandra.jpg

E biyonario mas jong di mundo tin 19 aña

Ainda faltando pa yega 20 aña, e hoben di Norway aki a bira e ...