(AP)—Cardenal Robert Prevost, un misionario Mericano cu a pasa su carera den Peru y ta ken ta lidera e oficina mas poderoso di obisponan den e Vaticano, a ser eligi como e prome Papa Mericano den historia di Misa Catolico. Prevost, 69, a tuma e nomber Leo XIV.
Den su prome discurso como sucesor di Papa Francisco, pronuncia for di e balcon di Basilica di San Pedro, Leo a bisa: “Paz sea cu boso,” y a enfatisa un mensahe di paz, dialogo y evangelisacion misionario. E tabata bistiendo un capa cora tradicional di e papado—un capa cu Francisco no a usa ora el a ser eligi na 2013—sugeriendo un regreso parcialmente na tradicion despues di un pontificado ortodox di Francisco.
Prevost tabata un di e candidatonan principal pa bira Papa, pero tabatin pa hopi tempo un taboo contra un Papa Mericano, considerando e poder geopolitico cu Merca ya tin den e esfera secular. Pero Prevost tabata aparentemente elegible pasobra e tambe tin ciudadania Peruano y a biba hopi aña na Peru, prome como misionario y despues como arsobispo.
Francisco claramente tabata tin un bista riba Prevost y den hopi manera el a mira cu e ta su obvio heredero. El a manda Prevost pa tuma cargo di un situacion diocesano complica na Peru, y despues el a trec’e na e Vaticano na 2023 pa sirbi como e hefe poderoso di e oficina cu ta evalua nominacionnan di obisponan na tur parti di mundo—un di e trabaonan mas importante den e Iglesia Catolico. Y na januari el a ascend’e na e rango superior di cardenalnan. Como resultado, Prevost tabatin un prominencia ora e conclave a cuminsa cual poco otro cardenal tabatin.
E conclave, cual a cuminsa diaranson, a mira miles di hende ta warda henter dia pa e Papa nobo. Un meuchi riba dak, en particular, a gara atencion y curason di miles mirando e live stream di e conclave.
E multitud na Plaza San Pedro a explota den celebracion ora huma blanco a sali di e Capia Sixtina durante e segundo dia di e conclave—esun mas geograficamente diversifica den historia.
Hisando banderanan di tur parti di mundo, dies miyones di hende tabata warda pa sa ken a ser eligi y a keda sorprendi ora un ora despues, e cardenal diacono mayor a aparece riba balcon y a bisa “Habemus Papam!” y a anuncia cu e eligido tabata Prevost.
El a papia cu e multitud den Italiano y Spaño, pero no Ingles.“Saludos…pa boso tur, y den particular, pa mi diocesis stima di Chiclayo na Peru, caminda un pueblo fiel a acompaña su obispo, a comparti su fe,” el a bisa den Spaño.
E ultimo Papa cu a tuma e nomber Leo tabata Leo XIII, un Italiano cu a dirigi e iglesia di 1878 te 1903. E Leo ey a suavisa e actitud confrontacional di e iglesia contra modernidad, particularmente ciencia y politica, y a establece e fundeshi pa pensamento social Catolico moderno, mas famosamente cu su enciclica Rerum Novarum di 1891, cual a trata derecho di obreronan y capitalismo na comienso di e revolucion industrial.
Expertonan di Vaticano a bisa cu e decision di Prevost pa yama su mes Leo ta particularmente significativo considerando e legado di husticia social y reforma di e otro Leo, sugeriendo un continuidad cu algun di e causanan principal di Francisco. “Mi ta kere cu e Papa aki ta mandando un mensahe tocante husticia social cu esey lo ta un prioridad. E ta sigui hopi di e ministerio di Francisco,” segun Natalia Imperatori-Lee, director di estudio religioso na Universidad di Manhattan na Bronx.
E Papa nobo tabata anteriormente e lider di e Orden di San Agustin, cu a ser forma den siglo 13 como un comunidad di faternan “mendicante”—dedica na pobreza, servicio y evangelisacion. Prome cu Leo XIV, tabatin seis Papa Agustino.
E rekisitonan y spirito di e orden ta deriva for di siglo 5 cu San Agustin di Hippo, un di e gigante teologico y devocional di Cristianismo. Segun su website, e Orden di San Agustin tin presencia den mas o menos 50 pais. Su spirito ta inclui spiritualidad contemplativo, bida comunal y servicio na otro. Un balor central den nan regla ta “biba hunto den harmonia, siendo un solo mente y un solo curason riba e caminda pa Dios.”
Prevost a gradua di Universidad Agustino Villanova, den e suburbio di Philadelphia, Merca, y su eleccion a yena e curasonnan di studiantenan Mericano cu ta studiando na Roma y cu pa casualidad tabata presente riba Plaza San Pedro pa testigua historia.
E pasado di Papa Leo
Francisco a move Prevost for di e liderato Agustino back pa Peru na 2014 pa sirbi como e administrador y despues arsobispo di Chiclayo.
El a keda den e posicion ey, obteniendo ciudadania Peruano na 2015, te ora Francisco a trec’e pa Roma na 2023 pa asumi e presidencia di e Comision Pontifical pa Latino America. Den e funcion ey e tabatin contacto regular cu e herarkia Catolico den e parti di mundo cu tin e mayoria cantidad di Catoliconan—cu claramente lo tabatin un rol den su eleccion.
For di e momento cu el a yega na Roma, Prevost a mantene un perfil publico modesto pero tabata bon conoci pa e hombernan cu ta conta.
Significativamente, el a presidi riba un di e reformanan mas revolucionario cu Francisco a implementa, ora el a agrega tres hende muhe na e grupo di voto cu ta dicidi cua nominacion di obispo pa manda na e Papa. Na comienso di 2025, Francisco a demostra su aprecio un bes mas prmocionando Prevost na e rango mas halto di cardenalnan.
E campananan di e catedral den e capital di Peru, Lima, a zona despues cu a anuncia e eleccion di Prevost. Hende pafo di e iglesia a expresa nan deseo pa un bishita papal den futuro. “Pa nos Peruanonan, ta un orguyo pa tin un Papa cu ta representa nos pais,” segun Isabel Panez, un docente di scol primario cu tabata cerca di e catedral ora e noticia a ser anuncia. “Nos ta desea pa e bishita nos aki na Peru.”
