Ayera, dia 11 di october, habitantenan di Parkietenbos y bisindario, a traves di un abogado, a manda un carta di contesta na Prome Minister, Evelyn Wever-Croes.
E carta ta declara cu e ciudadanonan en cuestion ta haya importante pa pone Wever-Croes personalmente na altura di nan problema, door di duna contesta na e carta di prome minister. Aki nan ta declara cu nan ta afecta directamente pa e decision di gobierno di uza un incinerator den su plan pa cera e dump di Parkietenbos, algo cu lo tin consecuencia serio pa nan salud y nan ambiente, en caso cu e plan di incinerator wordo ehecuta segun plan.
E habitantenan di Parkietenbos y bisindario, kende despues cu durante e ultimo 80 aña a confronta un situacion inhumano pa nan salud y ambiente pa motibo di e dump, awo mester sufri cu e decision di gobierno pa bin cu incinerator, cual lo ser construi directamente den nan luga di biba. Door di pone e incinerator west di WEB Aruba NV, pa motibo di direccion di biento, e gasnan y stof di esaki lo ser manda den direccion di Parkietenbos, cual lo tin consecuencianan negativo riba salud di e habitantenan den e area. Esaki sin cu e habitantenan a ser scucha of informa cu lo trece un incinerator den nan area. Tampoco nan por a tuma conocemento di reportenan tocante aspectonan ambiental y di salud di tin un incinerator den nan bario. Nan ta di opinion cu prome cu gobierno tuma un decision tocante construccion di un incinerator west di WEB Aruba NV, cu nan mester a informa ki consecuencia negativo esaki por trece riba nan salud y ambiente.
Ademas, e abogado, Maria Magdalena Edwina Henriquez, ta constata cu el a duna conseho na e habitantenan pa cuminsa un caso contra e prome minister e tempo ey, Mike Eman. Pero cu e habitantenan no a tribi di haci esaki pa motibo di miedo pa represalia politico. Ademas, a declara cu Fundacion Parkietenbos den pasado y actualmente no tin afinidad cu e habitantenan di Parkietenbos y bisindario, y cu no ta representa nan interes. Pa e motibonan aki e habitantenan a busca representacion legal.
