Habitantenan ta gana prome paso den caso dump ilegal refineria

Den e caso administrativo di e famia De Vries contra minister encarga pa actua contra un dump ilegal di asbest riba tereno di refineria, nan a gana e prome paso.

E famia, habitantenan na Lago Heights ta luchando pa hopi tempo caba contra e dump ilegal di asbest. E asbest ta dera eynan cual doño di e tereno, Refineria di Aruba (RdA) a confirma. Nan a dera e asbest cual Valero, e doño anterior di e refineria a laga atras den un forma iresponsabel, manera director di RdA tambe a bisa.

Sinembargo e deramento di asbest y otro kimiconan malo pa salud y medio ambiento no por sosode riba e tereno ey. Como cu e refineria tin un permiso pa haci molester (hindervergunning) sinembargo den dje ta para cu no por dera algo cu ta malo pa hende, animal y naturalesa. Y asbest ta entre otro causa cancer.

E lucha di e habitantenan ta uno largo. Nan tin un caso administrativo canando (LAR) y tambe uno contra Ministerio Publico (OM) pa actua contra e acto ilegal. E ultimo a base di e codigo penal unda e ley ta bisa cu no por haci algo cu ta pone salud di hende den peliger. Sinembargo OM ta referi na gobierno pa actua y asina segun e habitantenan, no kier tuma su responsabilidad.

Prome paso gana
E veredicto den e caso contra OM pa forsa nan haci investigacion (procedura articulo 15 cual, similar den caso uza di Zinnia Croes) ta planea riba 27 di maart. E siman aki e corte di LAR a dicta na fabor di e habitantenan como cu awor minister encarga, esta esun di husticia y tambe responsabel pa limpiesa di asbest (bou departamento di DTI) mester reaccion awor dicon no a actua e tempo ey (october 2016) contra e deramento ilegal di e asbest den cercania di e cas di e habitantenan.

E minister e tempo ey, Arthur Dowers (AVP), a manda nan un carta riba 24 di november cu e trabou (mientrastanto ya e trabou a caba), esta e limpiesa di e asbest a tuma luga segun ‘normanan internacional’. Den e carta a pone si cu e director di e departamento di DTI ta admiti cu no a duna suficiente atencion na e preocupacionnan di e habitantenan den cercania. Pero nan bisa cu a tuma e tempo ey suficiente medida pa garantisa e proteccion di nan, asina minister Dowers a bisa den e carta.

Pero segun hues administrativo e carta aki no ta suficiente. E no ta conta como un decision tuma riba e peticion di e habitantenan De Vries pa para e trabou di asbest na e momento ey. E habitantenan a pidi pa a base di e ley Hinderverordening pa para e dump di sushi cu asbest cerca di nan cas. Awor hues ta forsa minister di husticia pa bin cu un decision ainda. Cual ta importante pa e habitantenan pa den e caso atrobe gobierno ta nenga di actua pa apela atrobe. Cu e prueba fuerte den nan man (locual Bon Dia independiente tambe a constata) cu segun e permiso vigente no por dera nada peligroso na e tereno di refineria di San Nicolas.

Un punto remarcabel den e proceso aki ta keda e hecho cu ora Bon Dia a puntra minister di husticia e tempo ey, esta sr. Dowers, riba e carta, el a bisa cu e no tabata na haltura di dje. Dilanti e periodista di Bon Dia el a yama e director di DTI pa puntra un aclaracion. Hasta el a puntra, aunke su nomber tabata bou di e carta, si e of director di DTI a firma e carta concerni. Na e momento ey el a priminti pa investiga e caso aki sinembargo Bon Dia niun biaha a ricibi informacion mas.

Tampoco e abogado representando e minister den e caso di LAR a entrega prueba di defensa. Pues asina hues a dicidi cu awor minister mester contesta dentro di 3 luna y tuma un decision real (pues no fictivo).

You May Also Like

carnaval grandi.jpg

Procedura di personal DOW cu lo traha durante temporada di carnaval

Jossy Kock di  DOW,ta splica e procedura di seleccion di personal cu lo traha ...

Trabou ta cuminsa pa evalua infrastructura di KIA

KIA nobo posibel Pronto lo por bin un instituto di coreccion nobo. Esaki ta ...

Pa ASTEC empleadonan a bay dilanti den compensacion

Apesar cu e compania ASTEC cu ta encarga cu operacion di e waf di ...

Clayton croes (NW).JPG

Temporada di yobida criadero di sangura 2016 ta 3 biaha mas cu 2015

– E cantidad di criadero di e aña aki despues di e yobidanan a ...

Pastoor den protesta tambe

Dialuna ultimo, pader Andi a dicidi di uni su mes na e grupo di ...

Festival buki mucha (1).jpg

Tur cos ta cla pa e di 24 version di Festival di Buki pa Mucha

E di 24 version di Festival di Buki pa Mucha lo keda inaugura riba ...