Un edificio di cual Gobierno a ricibi hopi critica riba dje ta e edificio bandona na final di caya principal San Nicolas. Director di DIP, Haime Croes ta splica di e pasonan cu Gobierno a tuma pa por yega na soluciona e situacion aki.

Meta
Segun un comunicado di gobierno, manera comunidad por a tuma nota, Gobierno ta haciendo diferente esfuerso pa desaroya San Nicolas den e di dos ‘stedelijk gebied’ cual ta defini den ROP.

Pa esey kier pa tin na disposicion, terenonan bandona cu ta forma peliger pa e imagen di San Nicolas y diferente aspecto. Banda di esaki, e edificio en cuestion tin mas di 10 aña para y no ta den construccion, cual no mag huridicamente. Como consecuencia di esaki, permisonan di construccion ta wordo tuma aden.

Croes ta duna di conoce cu carta a bay pa e famianan en cuestion cu ta doño di e edificio, informando nan cu den 30 dia e departamento mester sinta cu nan pa por yega na un solucion. E ruina di hotel ta construi tambe parcialmente riba tereno di Gobierno, cual no mag. Pues aworaki ta haci apelacion na famianan pa por fabor sinta cu DIP pa por yega na soluciona e situacion aki. Algo cu pa añanan largo ta un preocupacion pa e bisindario y cual no ta cuadra cu e imagen cu ta creando di San Nicolas.

Por ultimo, ta informa pueblo cu DIP ta ehecutando cu e maneho di control den cual ta pone atencion na cosnan cu no ta bayendo bon segun nos maneho y leynan, manera erpacht y natuurverordening, conhuntamente cu DNM y DOW. P’esey ta recorda comunidad pa haci uzo di e plataforma InfrAruba pa cualkier keho cu tin y pa raporta esakinan, pasobra e informacion aki ta sumamente importante pa e departamentonan por traha mas efectivamente, Croes a termina bisando.

 

LEAVE A REPLY

Please enter your comment!
Please enter your name here