Di acuerdo cu e mas reciente edicion di e informe “Crop Prospects and Food Situation” publica diarason 13 di december pa United Nations Food and Agriculture Organization (FAO), Haiti ta actualmente e unico pais den America Latino y Caribe cu mester considera como un situacion di inseguridad alimentario severo.

Despues di e efectonan adverso di secura ripiti entre 2014 y 2016, y ademas e impacto devastador di e horcannan Matthew y Irma, respectivamente na 2016 y 2017, ta calcula cu 1.32 miyon hende mester di ayudo alimentario na Haiti. E pais tin actualmente casi 11 miyon habitante, di cual mas di 2,5 miyon ta biba den e capital Port au Prince.

Na Haiti, produccion di maishi, un di e cosechanan principal, ta insigur na 2017. Di acuerdo cu pronostico haci pa FAO, e produccion di e temporada di primavera (e temporada mas importante di produccion, 60% di produccion total di e pais), lo ta mas abao cu na 2016, mirando e impacto negativo di e secura prolonga cu a tuma lugar entre juni y juli 2017.

Ademas, siembra di verano di e aña aki a keda afecta pa horcan Irma na september, particularmente den e region nor-este di e pais, a afecta e pronostico di produccion severamente.