(DiarioLibre) – Secretario General di SOS Journalistes na Haiti, Joseph Guyler Delva, a denuncia diabierna ultimo, papiando na e di 81 Asamblea General di e Asociacion Interamericano di Prensa (IAPA), cu e situacion na Haiti ta “indescribibel” y cu “tin hende hasta den seno di gobierno cu ta apoya” gangnan criminal.

E periodista a presenta e caso di “un baby cu a ser asesina” pa un gang criminal den un candela: “Nan a ranca e baby for di brasa di su mama y a bent’e den vlam.”

E periodistanan no por a ni papia mucho tocante esey pasobra nan tabatin miedo di e gangnan, sosteni pa gobierno. “Mester bisa cu gangnan no ta actua nan so, pero cu tin hende hasta den gobierno cu ta sostene nan”, el a remarca.

Pa e periodista, e situacion na Haiti “ta un caos total y gobierno no ta haciendo nada”, y el a confesa cu nan a purba mat’e, cual ta motibo cu e mester a busca refugio na Merca.

Papiando hunto cu otro periodistanan na e Asamblea General di IAPA, cu lo tuma luga te diadomingo proximo na Punta Cana, Republica Dominicana, Delva a adverti cu Haiti ta casi “e luga mas peligroso na mundo pa ta un periodista” pasobra e pais ta “bandona na man di gangnan.”

“Ora bo tin gangnan ta maneha e pais y ta bisa bo kico pa haci, si bo ta na bida ainda ta pasobra e gangnan kier pa bo ser mata,” el a señala.

“En particular, periodistanan cu ta purba investiga problemanan di tur dia, corupcion y abuso di derechonan humano ta ser expone na peliger tur dia,” el a agrega.

Den e prome mitar di e aña aki, mas di 4 mil homicidio a sucede na Haiti memey di un crisis social y di seguridad afectando e pais Caribense.

E Organisacion Internacional pa Migracion (IOM) a informa cu e cantidad di personanan desplasa pa violencia y instabilidad na Haiti a alcansa “nivelnan sin precedente”, cu mas di 1.4 miyon persona obliga pa huy di nan cas e aña aki, e cantidad mas halto registra den e pais.

Dia 30 di september, Conseho di Seguridad di Nacionnan Uni a aproba un resolucion di Merca pa e despliegue di e Gang Elimination Force (GSF) pa e pais Caribense, reemplasando e Multinational Security Support Mission (MSS), cu a ser desplega aña pasa bao di liderazgo di Kenia sin logra resultadonan significativo.