Manifestantenan na Haiti a tira piedra riba e cas di Presidente Jovenel Moise durante un protesta di cuatro dia sigui contra corupcion. Miles a subi caya den henter e pais exigiendo cu Moise mester renuncia. Violencia entre polis y manifestante durante fin di siman a percura pa varios herido, mientras cu cuatro persona lo a perde nan bida.

Por lo menos un persona a keda mortalmente herida aparentemente pa agentenan policial durante un demostracion den centro di Port-au-Prince. Den e bario Petionville di e capital manifestantenan a cende candela y a blokia caminda pa cas di Moise, y a tira piedra y a bringa cu guardianan despues cu esakinan a proteha un aliado di Moise cu lo a bati un muhe.

Oficina di Derecho Humano di Nacionnan Uni a expresa preocupacion pa e violencia na Haiti cu awor a cuminsa tuma periodista como blanco. Na varios ocasion periodistanan tratando di haci nan trabao mester a busca refugio pa scapa di violencia. Un periodista a fayece y nuebe a keda herida te awor den e ola di protesta di ultimo tempo, segun un informe di Nacionnan Uni. Tambe a reporta cu por lo menos 42 persona a perde nan bida y 86 a keda herida den e protestanan cu ta domina e pais por completo pa varios luna.

Tin informe cu ta indica cu forsanan di siguridad tabata responsabel pa 19 di e mortonan, mientras e resto lo tabata victima di individuo arma o di otro persona desconoci, segun Vocero Farhan Haq di Nacionnan Uni.

Mientras tanto, ex-presidente Aristide a expresa su deseo di bolbe na Haiti pa yuda soluciona e crisis actual. No tabatin reaccion inmediato di otro forsanan politico.

 

LEAVE A REPLY

Please enter your comment!
Please enter your name here