Por lo menos nuebe morto y dos persona desapareci tabata e saldo cu tormenta Laura a laga atras na Haiti, cu awacero fuerte cu a causa inundacion y a menasa e unico dam hidro-electrico cu e pais ta posee.
Laura a sigui su rumbo y posiblemente lo ta na costa di Louisiana mas den siman, hunto cu otro tormenta, Marco, cu a bira horcan diadomingo pasa.
E centro di Laura a pasa Haiti diadomingo mainta despues di a pasa riba Puerto Rico y Republica Dominicana, unda el a laga cuatro morto y un mezcla destructivo di inundacion, awacero torencial y biento.
Na Haiti un mucha muher di 10 aña a bira victima na Anse-a-Pitre,cerca di frontera cu Republica Dominicana, ora un mata a cay riba nan cas. Na Republica Dominicana un mucha di 7 aña a muri hunto cu un muher di 44 aña ora nan cas a collapse na capital Santo Domingo, unda inundacion a causa daño grandi na viviendanan.
Funcionarionan publico na Haiti durante un rueda di prensa a urgi hende pa no purba cruza riu pa peligro di keda lastra pa e coriente, mientras den otro parti nan tabata urgi hende pa sali di nan cas y huy pa un lugar mas sigur.
Na e dam Peligre na e parti halto central di Haiti, importante pa suministro di electricidad, mester a habri paso pa awa sali bay abao pa garantisa cu e dam no lo a kibra, pero cu peligro pa e cunucunan di aroz den Valle Artibonite. E dam ta di importancia tambe pa irigacion pa e cultivo di aroz den e partinan mas abao na norte di Port-au-Prince, pero e probabilidad di su destruccion tabata real pa e cantidad di awa cu a acumula. Esey lo a significa tambe perdida di e 10 Megawatt di electricidad cu e dam ta duna.
