(AP) — Hamas a bisa diabierna cu nan a acepta algun elemento di plan di paz di presidente di Merca, Donald Trump, pa pone fin na guera den Gaza, incluyendo entrega su poder y libera tur rehen cu a keda, pero mester consulta otro puntonan mas largo entre e lidernan Palestino.
E declaracion a bin despues cu Trump a pone un ultimatum, bisando cu Hamas mester acepta e acuerdo te diadomingo anochi, menasando cu e lo sigui un ofensiva militar aun mas fuerte cu e e atake di 7 di october contra Israel. No ta cla kico Merca y Israel lo haci si Hamas solamente acepta parti di e propuesta.
Hamas a bisa cu nan ta dispuesto pa bolbe libera tur rehen segun e “formula” di e plan, lo cual por referi na e liberacion di centenares prisonero Palestino como intercambio. Nan tambe a reitera nan postura habri di entrega poder na un organo Palestino politicamente independiente.
Pero segun Hamas, algun punto di e proposicion, manera futuro di Gaza y derecho Palestino, mester ser dicidi a base di un “posicion unanime Palestino” den acuerdo cu otro fraccionnan y a base di ley internacional.
E declaracion no a menciona nada tocante desarmamento di Hamas, un punto esencial pa Israel den e propuesta di Trump. No tabatin ningun reaccion inmediato di Merca of Israel.
Trump ta desea mustra cu e por cumpli su promesa pa pone fin na guera y bolbe decenas di rehen prome cu e dos aniversario di e atake diamars. E plan di paz a ser acepta pa Israel y a ser ricibi cu agrado internacionalmente, pero mediadornan principal na Egypt y Qatar a bisa cu algun elemento mester mas negociacion.
Segun e plan cu Trump a presenta cu prome minister Benjamin Netanyahu mas trempan den siman, Hamas lo libera inmediatamente e 48 rehen cu a keda — rond 20 di nan considera na bida ainda. Hamas tambe lo entrega poder y desarma.
Israel, na su banda, lo para su ofensiva, retira for di hopi parti di Gaza, libera centenares di prisoneronan Palestino y permiti entrada di ayudo humanitario y eventualmente reconstruccion. Plan pa relocalisa gran parti di e poblacion di Gaza pa otro paisnan lo keda para.
Un teritorio cu mas o menos 2 miyon Palestino lo ser poni bao administracion internacional, supervisa pa Trump mes y ex-prome minister Britanico Tony Blair. E plan no ta contempla un caminda pa un reunificacion cu West Bank na un futuro estado Palestino.
Palestinonan ta desea un fin na e guera, pero hopi ta mira esaki y otro proposicionnan di Merca como fuertemente na fabor di Israel.
