Harold Malmberg a laga su marca den e industria mas importante di Aruba: turismo. E pionero y icono di Aruba awo a bay sosega despues di un ilustre carera.

El a inicia den industria di turismo trahando cu KLM y despues cu Maduro & Sons. El a demostra su compromiso, resiliencia y curashi na e momento clave unda a adkiri De Palm Tours, awo un compania iconico di Aruba. Cu un comienso humilde den añanan 1960, De Palm Corporation y su subsidiarionan a evoluciona bao mando di Malmberg den un exitoso y dinamico comapnia, hunto cu su socio Ramon Richardson.

Vision di Malmberg a guia De Palm Corporation na nivelnan halto di calidad y prosperidad, diversificando e negoshi den transporte di luho, deportenan acuatico, y eventualmente e creacion di e conocido De Palm Island. Su vision tabata clave den e desaroyo di turismo na Aruba, ya cu su ideanan a inspira e sector. Awo, su yiunan Ricky y Lisette ta carga e responsabilidad di continua cu su legado al mando di De Palm Corporation.

Malmberg a lidera Aruba Hotel and Tourism Association (AHATA) durante binti aña, guiando asina un di e aspectonan mas importante di turismo na nos isla. Igualmente, e tabatin un rol clave den e privatisacion di Aruba Tourism Authority (A.T.A.) den un autoridad independiente na 2011, dunando prioridad na sostenibilidad den turismo.

Na aña 2023, Gobierno di Aruba a reconoce e contribucionnan valioso di Malmberg pa Aruba, honrando e cu e “Officier in de orde van Oranje-Nassau.”

Ademas, pueblo di Aruba a sa di conoce Malmberg como un persona humanitario cu tabata yuda den esnan den necesidad. El a facilita tratamento medico pa esnan cu tabatin mester di cuido pafo di Aruba, a duna conseho valioso na esnan enfrentando retonan dificil, y consistentemente a demostra un curason amabel, un espiritu generoso, y actonan di compasion entre su persona y su esposa.
E tambe ta e visionario fundador di e Fondo di Pensioen di sector di turismo na Aruba.

E impacto y legado di Malmberg ta bay keda resona den historia di Aruba, y sigur den curason di tur esnan cu a conoc’e y stim’e.

Bon Dia Aruba ta manda palabra di condolencia na su sernan keri, y cu Harold Malmberg sosega na paz.