HAVA y AZV ta den comunicacion cu otro, pero no kier pa e deliberacionnan sosode pa medio di prensa. Bon Dia Aruba a tuma contacto cu Presidente di HAVA, esta asociacion di dokternan di cas, cu ta dr. Joaquin van Trigt ayera, despues cu e asociacion a manda un carta na AZV anunciando orarionan nobo.

Den su carta di 1 di April 2021, HAVA a informa cu entrante e dia ey mes, oficinanan di dokter di cas na Aruba ta ahusta nan orario di servicio.

Den e carta, HAVA ta informa cu e cortamento reciente den e gastonan di cuido medico door di AV y Gobierno a causa problemanan financiero pa cierto oficina di dokter di cas. E cortamento aki ta nifica cu AZV ta pagando menos pa cuido medico y esaki tin un efecto directo riba e honorario, cu ta otro palabra pa e presupuesto di e grupo aki di dunadonan di servicio medico. Consecuentemente segun e carta, dokternan di cas no por cumpli mas cu cierto pago manera huur of hipoteca di nan oficina, pago di coriente, material medico of salario pa e assistentnan.

E asociacion a puntra AZV, cu si diferente dokter di cas cera nan porta of kita personal di trabou pa motibo di no por cumpli mas cu pagonan, kico lo pasa cu e pacientnan. Pa e motibo aki y pa por wanta e oficina habri pa un tempo mas largo, lamentablemente dokternan di cas ta haya nan mes ta corta den gastonan di oficina, door di ahusta e orarionan.

E orarionan di oficina a bira di 8’or di mainta te 12’or di merdia y despues unicamente di 2’or di merdia pa 3’or di merdia. E paso aki, segun e carta di 1 di April, ta pa un tempo indefini.

Den casonan di urgencia, e dokternan di cas lo keda oficina, mescos cu ta sosode tur momento pa medio di nan liña di emergencia. E orario pa e yamada di emergencia ta di 7’or di mainta te 6’or di atardi, y si ta trata un pacient cu COVID-19, e dokter di cas lo ta disponibel di 7’or di mainta te cu 7’or di anochi. Pero, despues di 6’or di atardi y den fin di siman, tur pacient por acudi na e Oficina di Dokter di Cas di Hospital of na dokter di cas na warda, pa pariba di brug.

AZV a reacciona

Bon Dia Aruba a tuma contacto Diahuebs y ayera cu Dr. Joost Samuels di AZV riba e kico e paso aki ta nifica. Segun dr. Samuels, no por a duna comentario riba Diahuebs pa motibo cu a reuni henter dia riba e carta aki di HAVA. Ayera, dr. Samuels a confirma cu a bay un carta pa HAVA como reaccion riba e ponencia di e asociacion di dokternan di cas.

Segun Joaquin van Trigt na Bon Dia Aruba, e carta tabata pa percura cu AZV sinta na mesa cu e asociacion. No tabata pa prome biaha cu a ilustra e problemanan financiero cu varios oficina di dokter di cas a confronta pa motibo cu a dicidi pa corta den pago pa e grupo aki di dunado di cuido.

Sinembargo, dialuna, Dr. Van Trigt no kier a elabora riba e carta cu a ricibi di AZV, ya cu ta prefera pa delibera cu e entidad den trankilidad. Riba e pregunta si e orario di oficina ta keda manera a menciona den e carta di 1 di April 2021, Dr. Van Trigt a bisa ayera tardi cu esey lo ta e caso.

LEAVE A REPLY

Please enter your comment!
Please enter your name here