Administracion di Trump a pronuncia su mes fuertemente contra e plan ambicioso di Facebook pa crea un moneda digital nobo, mientras e hefe di tesoreria a adverti cu lo por uza esaki pa actividad ilicito, manera labamento di placa, traficacion humano, y financiamento di terorismo.
Secretario di tesoreria, Steven Mnuchin a expresa ‘preocupacion hopi serio’ tocante e moneda proponi pa e gigante di rednan social, cual lo wordo yama Libra. “Esaki ta en berdad un asunto di siguridad nacional”, Mnuchin a bisa reporteronan na Cas Blanco.
Su comentarionan a yega algun dia despues cu presidente Donald Trump a tweet cu Libra ‘lo tin poco dependabilidad’.
Trump, recien sali di un ‘cumbre di rednan social’ cu el a tene na Cas Blanco, cual a atrae conservadonan critico di Big Tech, a tweet siman pasa: “Mi no ta un fanatico di Bitcoin y otro moneda virtual, cual no ta placa, y cual nan balor ta altamente volatil y basa riba aire fini. Activonan virtual sin regulacion por facilita comportamente ilegal, incluyendo comercio di droga y otro actividad ilegal.”
Si nan kier drenta mercado financiero, Facebook y su decenas di compania socio den e empresa mester acepta e regulacion estrecho cual banconan ta bou di dje, e presidente a bisa.
E comentarionan di e hefe di tesoreria a bay mas leu, marando Libra directamente cu preocupacion tocante uzo potencial pa labado di placa, droga y traficacion humano, evasion di impuesto y otro crimen. Facebook ‘tin hopi trabou pa haci prome cu nos yega e punto cu nos ta comodo cune’, Mnuchin a bisa.
Diamars, congreso ta cuminsa dos dia di audiencia tocante e plan di Libra di Facebook. Cabesante di Reserva Federal tambe a bati alarma tocante e plan siman pasa.
E plan di Facebook ‘ta lanta un cantidad di preocupacion serio, y esey lo inclui privacidad, labado di placa, proteccion di consumido, stabilidad financiero’, segun presidente federal Jerome Powell a bisa den un testimonio congresional. “Esakinan mester evalua a fondo y publicamente prome cu esaki procede.”
A diferencia di Mnuchin, Powell – como presidente di Banco Central – ta un regulado independiente kende ta separa di e administracion y influencia politico.
Ya caba bou scrutinio intenso di reguladonan y congreso tocante privacidad y dominio di mercado, Facebook a lanta rabia den Capitol Hill luna pasa ora a revela su plan pa crea un ecosystema financiero nobo basa riba moneda digital.
A pone audiencia cu Senado y Congreso riba agenda, y e cabesante democratico di e Comite pa Servicio Financiero di Congreso a pidi Facebook pa suspende e plan te ora Congreso y reguladonan por revisa esaki.
David Marcus, e ehecutivo di Facebook liderando e proyecto, a bisa den su testimonio prepara pa e audiencia di e panel di Servicio Financiero cu Libra ‘ta pa desaroya un manera sigur y cu costo abou pa hende move placa eficientemente rond mundo. Nos ta kere cu Libra por haci un progreso real pa construi un infrastructura financiero mas inclusivo’.
Facebook ta di acuerdo cu Powell cu e revision gubernamental di Libra mester ta ‘cu pasenshi y a fondo, na luga di core pa implementacion’, segun e declaracion di Marcus.
E moneda digital planea ta mira como un ‘stablecoin’ (moneda stabiel) sosteni pa deposito den moneda soberano manera dollar, euro y yen Hapones – a diferencia di bitcoin, ether of otro moneda digital. Primintiendo cuotanan baho, e por habri comercio online pa miyones di hende rond mundo cu no tin acceso na cuenta di banco, y haci mas facil pa manda placa a traves di fronteranan. Pero tambe ta lanta preocupacion tocante privacidad di e data di usuarionan y e potencial pa criminalnan pa uz’e den labado di placa y fraude.
