(AP) – Mientras e personanan cu kier mira e eclipse ta mira den shelo, e personanan cu tin problema di bista of ta ciego completamente lo por tende y sinti e evento celestial aki.
Dispositivonan di zonido y sentido lo ta disponibel pa sitionan publico dia 8 di april, ora cu un eclipse solar total lo crusa Nort America, unda e luna ta tapa e solo pa algun minuut. “Eclipsenan ta algo sumamente bunita y tur hende mester por experiencia esaki por lo menos un biaha den nan bida,’ Yuki Hatch di Austin Texas a comenta. Hatch a ta un hoben cu tin problema di bista y ta stima espacio, cu speransa di algun dia por bira un cientifico di computer pa NASA. Riba dia di e eclipse, su persona y su amistadnan di scol na Texas School for the Blind and Visually Impaired tin plan di sinta pafo na scol y tende for di un dispositivo chikito yama LightSound Box cu ta traduci e cambio di luz den zonido.
Ora cu e solo ta briya fuerte, lo tin notanan delica y halto. Mientras e luna ta cuminsa cubri e solo, e notanan ta bira manera un clarinet den rango medio. Scuridad ta traduci den un zonido di nota abao. “Mi ta emociona pa por tende e eclipse na luga di wak e,” Hatch a comenta.
E dispositivo en cuestion. LightSound ta resultado di colaboracion entre Wanda Diaz-Merced, un astronomo cu ta ciego y astronomo di Harvard Allyson Bieryla. Diaz-Merced regularmente ta traduci su data den audio pa analisa modanan den su investigacionnan. Un prototipo a ser usa pa prome biaha durante 2017 su eclipse solar total cu a crusa Merca y awo ta usa e dispositivo na otro eclipsenan.
E aña aki, nan ta trahando cu otro institucionnan cu e meta di distribui por lo menos 750 dispositivo na localidadnan cu ta anfitriona eventonan na Mexico, Merca y Canada. Nan ta organisa workshop na universidadnan y museonan pa construi e dispositivonan y ta provee e informacion pa hende por haci esaki nan mes riba e website su grupo.
“E shelo ta pertenece na nos tur. Y si e evento aki ta disponibel pa e resto di mundo, e mester ta disponibel pa e personanan cu ta ciego tambe,” Diaz-Merced a comenta. “Mi kier pa studiantenan por tende e eclipse, pa nan por tende e streanan.”
The Perkins Library, asocia cu Perkins School for the Blind na Massachusetts, tin plan di broadcast e zonido via Zoom pa miembronan por tende online of via telefon, segun manager Erin Fragola. Ademas na studiantenan, hopi di e biblioteca su miembronan ta personanan di edad avansa cu tin perdida di vision relaciona cu e edad. “Nos ta purba busca manera pa haci tur cos mas accesibel pa tur hende,” el a comenta.
Otronan lo experiencia un evento solar via e sentido di mishi, cu Cadence Tablet di Indiana su Tactile Engineering. E tablet aki ta e tamaño di un celular cu rijnan di punt cu ta sali y drenta. E por ser usa pa un variedad di proposito; lesa Braille, sinti graficonan y videonan cu ta move y hunga video games. Pa e eclipse, “un studiante por pone nan man riba e dispositivo y sinti e luna ta move poco poco riba e solo,” Tactile Engineering su Wunji Lau a splica.
Indiana School for the Blind and Visually Impaired a cuminsa incorpora e tablet den su curriculum aña pasa. Algun di e studiantenan a experiencia october ultimo su “ring of fire” cu e tablet.
