Riba Dia Internacional di Hende Muhe nos a conmemeora y celebra e muhenan rond mundo pa pa nan acto- y logronan na bienestar di sociedad, ni con grandi of chikito esakinan por ta. Den e caso aki, un acto chikito a salba un hoben di un experiencia traumatico, of por a hasta salba su bida, cu su acto di bondad y di proteccion pa otro hende muhe.

Un hoben, hende muhe, Arubiano, cu a papia den condicion di anonimato, a conta Bon Dia Aruba su storia di con un hende muhe, taxista, a salbe di pasa un experiencia traumatico y posiblemente hasta salba su bida.

E hoben aki ta conta cu tempo e tabata studia afo, el a pasa den un experiencia no mucho agradabel y cu te dia di awe, e por corda solamente algun pida di e anochi ey.

El a conta cu aunke e enfoke semper tabata pa caba su studio, e tabata mantene un bida social basta activo den sentido cu e tabata sali cu amiga- y amigonan, sali come, sali trip, etc. Y riba un anochi, mane cualkier otro anochi, el a dicidi di sali un rato cu un grupo di amiga, sin sa cu e su anochi lo termina di un forma cu e no a spera.

ā€œE anochi a cuminsa trankil y mas cu claro tabatin alcohol envolvi den e tripmento, pero tur cos tabata rutig y nos grupo di amiga tabata combersa y dal un paar di drinks. Despues di un rato, mi a acerca e bar pa cumpra otro rond di cos bebida y un hoben, homber, a cuminsa un combersacion cu mi, el a puntra nomber, edad, di unda mi ta etc. y na final el a ofreccemi algo di bebe. Aunke mi tabata sa miho, mi a acepta su bebida. Y Esey ta basicamente e ultimo cos cu mi ta corda di e anochi ey,ā€ el a conta.

E siguiente dia, e hoben a sigui conta, el a lanta riba stupi di su apartament, sin sa con el a yega eynan y cu un nota den su tas. E nota tabata di parti di un taxista muhe, cu a yude yega su cas. Den e nota tabatin e number di telefon di e taxista y e hoben a contact pa puntre kico ta loke a pasa y con el a yega su cas.

ā€œE taxista a contami cu mi tabata canando, hopi burachi, y mi tabata wordo compaƱa pa dos homber y cu nan tabata basicamente cargami. Nan a yama e taxista ey pa hiba nos un caminda, e taxista a bisami el a wak mi estado y cu el a puntrami si mi kier keda cu e hombernan aki, y segun el a bisami mi a contesta no y eynan ta unda el a saca e hombernan for di su taxi y hibami cas. Ami mes no ta corda nada, pero segun mi a bise unda mi ta biba y el a lagami na cas. Danki na e hende muhe aki cu mi no tabata conoce cu e protehami, mi a scapa di por a wordo viola of hasta mata,ā€ e hoben a remarca.

Pa e hoben aki, e experiencia ey ta uno cu semper e ta corda, un memoria cu te dia di awe, aunke e no tin mucho recuerdo di hopi cos cu a pasa e anochi ey, ta keda bin dilanti y ta un les pe y pa otro hobennan den futuro.

LEAVE A REPLY

Please enter your comment!
Please enter your name here