Hende ta sigui tira bestia morto den area publico

Un problema cu ta keda bin bek ta e asunto di tiramento di bestia morto den area publico. Segun Serlimar, nan no ta cobra pa e servicio di busca y tira bestia morto afo pues nan no ta compronde pakico hende no ta acudi cerca nan pa e servicio aki.

 

Bon Dia Aruba a topa cu un cacho morto cu a wordo benta riba Bubali Plas cu ta mustra e tin basta dia eynan. Bird Sanctuary na Bubali Plas awor tambe parce cu ta birando victima di esaki. Segun director suplente di Serlimar Victor Robert,  nan a cuminsa topa cu e situacion aki mas frecuente den diferente areanan publico. 

 

Otro area cu tambe ta victima di esaki ta entre otro Seroe Cristal, caminda basta cacho morto sa wordo tira eynan y tambe den cercania di Arashi varios biaha hende ta laga diferente bestia morto eynan for di pushi, cacho te cu cabrito.

 

”Mi no ta compronde pakico hende ta sigui haci e cos aki pasobra si bo yama nos, duna nos e adres, nos ta bay anto tuma e bestia mesora. No tin mester di benta esakinan den mondi.” 

 

Sr. Robert ta enfatisa cu Serlimar no ta cobra pa e servicio aki anto cu bo por yama na 5825080, e trahado di siguridad ta nota e adres y pasa esaki na e persona cu lo ta cerca riba caminda na e momento ey pa deshaci di e bestia.