(AP)—Dies miyones di cangreu cora ta migrando pa e ocean como parti di nan migracion anual riba Christmas Island, unda un poblacion humano hopi mas chikito ta usa leak blower y hark di hardin pa yuda nan riba nan caminda.
E gerente interino di e Parke Nacional di Christmas Island Alexia Jankowski a bisa diahuebs cu tabatin te cu 200 miyon di e cangreu endemico, conoci tambe como Gecarcoidea natalis, riba e teritorio chikito di Australia den e Ocean Indio. A anticipa cu te cu 100 miyon lo migra for di nan habitat den boske pa lama unda nan ta broei.
E comienso di e temporada di yobida den e hemisferio sur weekend pasa a causa e migracion anual. E cangreunan ta busca sombra merdia, Janowski a bisa, pero mainta trempan y atardi nan ta cuminsa marcha y por mira nan move pa e costa riba caminda y den hardinnan.
Nan 1.200 bisiña humano riba e isla en general ta haci loke nan por pa claria e tapijt cora di cangreu riba e caminda. “Algun hende ta pensa cu nan ta stroba, pero mayoria di nos ta pensa cu e ta un privilegio pa mira. Nan no ta discrimina. Pues no ta importa si tin cualkier obstaculo pa yega lama, nan ta yeg’e. Pues si bo laga bo porta habri, bo ta bay haya hopi cangreu den bo sala. Algun hende mester hark nan cura ora nan sali cu auto sino nan lo por herida e cangreunan,” el a agrega.
Riba canto di lama, e cangreunan macho ta coba buraco unda e hembranan ta pasa dos siman ta pone y fertilisa webonan. E hembranan ta anticipa di pone nan webo den ocean dia 14 of 15 di november ora nivel di awa ta halto, durante e ultimo kwartaal di luna.
E cangreunan jong ta pasa un luna nabegando e coriente di ocean como larva prome cu nan regresa Christmas Island como cangreunan chikito. “Ora nan ta baby casi mita tamaño cu bo huña, nos no por pasa hark riba tera, pasobra lo bo mata nan. Pues nos ta usa leaf blower,” Jankowski a bisa.
“Pues un luna despues cu e cangreunan pone webo, nos ta riba costa bisti cu tas di leaf blower ta purbando di hala e cangreunan chikito for di caminda pa asina reduci impacto cu auto,” el a agrega.
