Tur aña, mas cu 1.600 hoben di e parti Caribense di Reino ta cuminsa cu nan estudio na Hulanda. Pa haci e transicion di enseñansa riba e islanan pa enseñansa avansa na Hulanda mas suave, gobierno Hulandes a desaroya un herment special. E herment aki ta brinda studiantenan prospecto y nan mayornan un bista di tur asunto cu nan mester regla prome y despues di nan salida pa Hulanda.

Via e herment riba rijksoverheid.nl/caribischestudenten, studiantenan di Caribe ta ricibi un bista personal cu informacion tocante nan derechonan, cual asuntonan mester ser regla y unda nan por haya yudansa. Banda di e version Hulandes, nan ta ofrece un version na Ingles tambe cu ta obtenibel riba government.nl/caribbeanstudents.

Minister di Enseñansa, Cultura y Ciencia Hulandes, Eppo Bruins, a expresa cu e ta contento cu e yegada di e herment aki. “Studiantenan di e parti Caribense di nos Reino mester tin e mesun oportunidad y chensnan cu nan coleganan studiante aki na Hulanda. Nos kier evita cu studiantenan ta keda pega riba tur tipo di asunto administrativo y zorg pa un bon comienso Cu e herment nobo aki studiantenan di Caribe por prepara miho pa nan estudio na Hulanda. Tur loke nan mester regla ta awor den un bista cla. Di e manera aki, e futuro studiantenan por prepara bon y enfoca principalmente riba nan estudio na yegada na Hulanda,” el a bisa.

Segun gobierno Hulandes ultimo añanan, parcialmente riba conseho di Ombudsman Nacional, a haci trabounan duro tambe riba otro frentenan pa mehora e suministro di informacion, guia y preparacion pa studiantenan di Caribe. For di aña pasa, automaticamente studiantenan di Caribe ta ricibi un number di servicio di ciudadano (BSN) ora nan aplica pa financiamento di studiante. Asina nan por aplica pa un DigiD y regla un cantidad di asuntonan prome cu sali pa Hulanda.

Mas aleu, tin iniciativanan manera Aña Fundacion Academico Caribense na Aruba, Corsou y, entrante augustus 2025, tambe na Sint Maarten, Saba y Sint Eustatius pa prepara studiantenan miho pa estudio otro caminda. Alabes e ‘Colaboracion HBO Student Success Caribbean Students’ ta trahando riba un programa integra cu ta sostene y guia studiantenan den haci un escogencia di estudio, mehora idioma y habilidadnan di estudio y cu ta brinda preparacion pa un bon transicion cu atencion pa studia na Hulanda y cultura Hulandes.

E herment a ser crea pa medio di un colaboracion entre Ministerio di Enseñansa, Cultura y Ciencia, Ministerio di Interior y Relacionnan den Reino, Agencia Ehecutivo di Enseñansa, Banco di Seguro Social, SKGZ (antes Liña di Seguro di Salud), Aliansa Strategico di Enseñansa y Servicio Publico y Comunicacion.