Hipoteca Citgo no ta peliger pa refineria Aruba

citgo


Durante e acuerdo entre e contratista Frances principal y Citgo Aruba, minister Richard Arends di Economia a indica cu e noticia cu PDVSA a hipoteca Citgo Merca, no tin efecto pe refineria na Aruba.

E minister ta splica cu e refineria di Aruba ta den man di gobierno y Citgo ta e huurdo. Pues e garantia duna pa asina PDVSA por busca finansa nobo, no por tin un impacto na Aruba. Locual nan a hipoteca ta refinerianan na Merca cu ta den man di Citgo na e pais aki, asina e minister ta splica. E tambe kier enfatisa cu Citgo Aruba tambe ta riba su mes y un compania solido mescos cu e holding na Merca cu ta e doño di Citgo Aruba.

E compania petrolero Venezolano PDVSA a admiti na december cu nan a hipoteca e 49% restante di e accionnan di e empresa Mericano Citgo, cual ta 100% den man di PDVSA. Nan a haci esaki despues e fuente Latin America Herald Tribute a trece e noticia cu e compania estatal di Venezuela a hipoteca Citgo secretamente na un filial financiero Ruso. Segun PDVSA ainda nan tin e control di e compania. Nan a hipoteca e 49.9% di accionnan solamente pa ricibi finansa nobo.

Asina a keda hipoteca 100% di e accionnan di CITGO, ya cu PDVSA a hipoteca  50,1% di CITGO Holding Inc. como garantia pa e tenedonan di bono di PDVSA, cu vencemento e aña aki, pa cambia nan pa un bono nobo cu ta madura na 2020.  Den caso di incumplimento di PDVSA, e tenedonan di e bononan nobo di PDVSA pa US$ 3.400 miyon na 8.5%, lo por tuma 50.1% di Citgo Holding Inc.

Citgo Petroleum Corporation ta posee oleoducto y gasoducto na Merca, como tambe e refinerianan na Corpus Christi, Texas; Lake Charles, Louisiana; y Lemont, Illinois. E refinerianan di Citgo por refina aproximadamente 749.000 bari pa dia y e refineria di Lake Charles ta e di seis refineria mas grandi di Merca. Tambe e compania tin terminal y facilidad di almacenamento di crudo y producto.

E hipoteca a keda descubri a traves di un declaracion di e entidad Uniform Commercial Code di Delaware (UCC) na fabor di Rosneft Trading SA haci pa PDV Holding Inc cu a ser descubri pa e agencia Redd Intelligence cu a difundi e noticia.


Durante e periodo di vigencia di e hipotecanan, PDVSA ta keda impedi pa eherce su propiedad di e empresa Citgo, manera dispone di su accion, bienes y activo. Cu e operacion aki 100% di Citgo ta den man stranhero mientras e hipotecanan ta vigente.

E organismo UCC ta ser uza pa proteha acreedornan y pa informa otro posibel acreedor cu tin interes den e activonan di un compania.

Russ Dallen, di e Fondo de Oportunidades Venezuela, cu a yuda pa describi e hipoteca secreto, a señala cu dia 30 di november e reservanan di Venezuela a subi diripiente cu US$ 891 miyon, sin cu analistanan tabata capaz di splica di unda e placa aki a sali. Pues ta pensa awor cu e suma aki lo ta e restante di e prestamo di Rosneft.

Citgo ya ta ser demanda na Delaware separadamente pa ConocoPhillips y Crystallex bao di e Ley Uniforme di Transferencia Fraudulento di Delaware, alegando cu  Citgo, PDVSA y Venezuela “a transferi fraudulentemente” US$ 2.800 miyon for di Merca pa evita miles di miyon di pago na acreedornan.

 

You May Also Like

Artesanonan local awo ta conta cu Seyo Nacional di Cultura

Cosecha ta e tienda di Departamento di Cultura Aruba caminda ta bende artesania autentico ...

Cas di Fontein birando un peliger mas grandi

Mester percura cu e status di proteccion di edificionan cu balor monumental por sigui ...

Fundacion Rancho a duna contenido y balor na Dia Internacional di Migrante

Diamars ultimo a wordo conmemora Dia Internacional di Migrante. Un fecha cu Asamblea General ...

‘Educacion, legislacion y control ta primordial pa bayena y dolfijn keda bishita nos costa’

Fundado y presidente di Aruba Marine Mammal Foundation Angiolina Henriquez kende tin casi 10 ...

Varios arma di candela, droga y placa confisca na Saliña Cerca despues di entrada hudicial

Afpakteam a tene un accion grandi conhuntamente cu Marechaussee (Kmar) y Ministerio Publico di ...