Un hoben di 17 aña a perde su bida den e parking lot di un club nocturno na Palm Beach, segun polis a anuncia diadomingo mainta.

Segun Cuerpo Policial di Aruba a informa, pa alrededor di 1:18 di marduga riba diadomingo, Central di Polis a haya un notificacion cu un hende homber a ricibi tiro y no ta reaccionando den e parking lot di Fat Tuesday.

Inmediatamente central a despacha polis y ambulance cu urgencia pa e sitio di e incidente.

Na momento cu polis a presenta na e sitio, berdaderamente a bin topa cu un hende homber cu no tabata reacciona. Na su turno, ambulance a presenta pa duna tratamento na e victima; sinembargo, lamentablemente no tabatin nada cu por a haci mas pa e persona en cuestion.

Recherche y polis tecnico a presenta pa asina por haci nan investigacion mientras cu e dokter forensico a presenta y a constata e morto di e hende homber, ken pa e momentonan ey no tabatin informacion di ken e ta.

Inicialmente, polis a bisa cu mas informacion di e victima lo ser duna na momento cu familiarnan identifica su persona. Mas adelante, a publica un actualisacion unda a informa cu e famia a reconoce e victima y a informa cu ta trata di e hoben Rayden K.A Kock, naci na Aruba dia 3 di juli na 2008, pues e victima tabatin apenas 17 aña di edad.

E caso aki ta bao investigacion y Cuerpo Policial a haci un apelacion pa personanan cu por tin algun informacion tocante e sucedido, y a pidi pa informa esaki pa medio di yama e tiplijn di polis cual ta 11141, kedando completamente anonimo.

Bon Dia Aruba ta manda condolencia y forsa pa e familiarnan y demas sernan keri di e fayecido.

Proliferacion di arma ilegal

Na maart di e aña aki, a cuminsa cu accion di entrega di arma di candela ilegal cu a core te cu dia 24 di april. E accion tabata interinsular y tabata regarda e Cuerponan Policial di Caribe Hulandes den cooperacion cu Colegio di Hefenan di Cuerpo (College van Korpschefs).

E tempo aki, Cuerpo Policial Aruba y Ministerio Publico a enfatisa cu e uso di arma di candela ilegal ta hiba na incidentenan serio. Posesion di arma di candela ilegal ta trece un sentimento di inseguridad den comunidad y ta hiba na mas violencia y mas inseguridad.

Segun ley, si haya un persona cu un arma di candela ilegal den su posesion, e persona lo keda deteni y sentencia pa un hues. Tin hende cu ta ser sentencia pa algun aña di prison djis pa posesion di arma. Sinembargo, por sucede cu e persona cu tin un arma di candela ilegal no kier esaki mas, pero no kier entrega esaki na polis tampoco pa miedo di keda deteni y cu e mester legitima su mes. Pa e motibo aki a tene e accion pa entrega di e armanan di candela. Den e periodo aki e personanan cu a entrega nan arma di candela no a ser persigui penalmente y a keda anonimo.

Sinembargo durante e periodo di e accion aki mes a detene un homber pa posesion di arma di candela, ken a keda condena cu castigo di prison. E detencion a tuma luga riba dia 29 di maart, despues cu durante un control den vehiculo di e sospechoso, agentenan policial a haya un tas cu tabata contene e arma di candela hunto cu su municion. E incidente aki a pone enfasis riba e peliger cu presencia di arma di candela ilegal ta representa den comunidad, pa motibo cu den cierto caso, pa no bisa mayoria, e persona ta cana cu su arma y cualkier situacion por escala.

Mesora a detene e persona en cuestion pa violacion di Vuurwapenverordening y cu rapidez a hiba e sospechoso dilanti corte den loke ta yama un “snelrecht zitting.” Hues a conden’e pa un castigo di prison di 18 luna, di cual 6 di nan ta condicional. Ademas, e ta bao supervision di Reclassering como un condicion adicional.

Aunke e accion di entrega di arma a tuma luga y a implementa e campaña nacional, toch incidentenan relaciona cu posesion di arma di candela ilegal a tuma luga.

Atrobe den un “snelrecht zitting” cu a tuma luga dia 5 di mei, corte a sentencia un hoben di 18 aña pa 12 luna den detencion hubenil (jeugddetentie). Esaki ta bira e segundo sentencia di posesion di arma desde cu KPA a implementa e campaña nacional pa personanan entrega nan arma di candela di manera anonimo. Den e caso aki, e sospechoso L.D.I a presenta den un “snelrecht zitting” dia 5 di mei pa su acusacion di posesion di dos arma di candela ilegal. Su sentencia a bin despues cu a el a ser deteni dia 22 di april 2025 door di e Atraco Team di KPA.

Segun a splica, a para e hoben riba Green Corridor despues cu e departamento a ricibi informe cu e hoben lo por tin arma di candela ilegal den su posesion. Despues di verifica e informacion, Atraco Team conhuntamente cu Aresto Team a tene nan accion y a para e Nissan March color shinishi cu e hoben tabata maneha. Durante control di e auto a haya un arma di candela. Ambos e arma y auto a ser confisca pa autoridadnan.

Debi na e confirmacion aki, e departamento a sigui cu un investigacion na un cas na Balashi. Eynan a logra haya mas municion cual tambe a confisca.

Corte a duna sentencia di 12 luna den prison, cu 6 di nan condicional. Ademas, a duna e condenado 3 aña di prueba y hues a pon’e bao supervision di Stichting Reclassering, cual ta e institucion encarga cu rehabilitacion y guia pa hobennan cu tin un historia criminal.

Extension di campaña

Lansa dia 23 di maart, e campaña tabata inicialmente programa pa dura un luna, esta te 28 di april. Sinembargo, fin di april KPA a haci un anuncio cu e campaña lo a prolonga pa un otro luna mas, cabando ayera dia 24 di mei.

E resultado di e campaña aki no a genera gran iniciativa, cu reportahe di solamente 2 persona haciendo uso di e bakinan mientras cu 5 persona a ser deteni pa posesion di arma di candela ilegal.

Esaki ta enfatisa cu tin un necesidad grandi pa mas accion den e area aki, mirando cu e campaña nacional no ta dunando resultado di un grado cu ta cana paralelo of mas halto cu e mesun detencionnan cu ta purba di evita. E realidad ta keda cu personanan cu tin arma di candela ilegal den nan posesion ta presenta un peligro tanto na nan mes, cercanonan como comunidad henter y mester tuma accion pa evita mas morto.

E dolor y sufrimento cu e mortonan aki ta causa ta ireparable pero na mesun momento evitable, y ta trabao di autoridadnan pa tuma accion concreto y efectivo pa combati e problema aki cu ta keda presente den comunidad. Banda di esaki, tambe ta responsabilidad di nos como comunidad pa sigui conscientisa otro y participa ora cu e iniciativanan aki presenta, pa motibo cu e peligro no ta solamente pa esnan fuera di nos circulo cercano, sino tambe pa nos sernan keri y te hasta pa nos mes.

Aunke no sa si e caso di e hoben su fayecimento ta involucra posesion di arma di candela ilegal, e ta sigui algo cu ta presenta e riesgo cu cualkier situacion por escala na un punto mortal pa motibo cu nos no sa ken ta y no ta den posesion di un.

Ta sumamente importante pa coopera cu autoridadnan y participa den e iniciativanan cu ta facilita e entrega di e armanan, pero tambe pa e trabao di parti di autoridadnan sigui pa combati esaki di manera efectivo cu ta trece resultado.

Un biaha mas, Bon Dia Aruba ta manda palabranan di forsa y condolencia pa e familiarnan y demas cercanonan di e fayecido.