Diadomingo anochi, e suceso di un hoben di binti un aña cu a perde riba lama mientras e tabata core riba un jet ski, a crea hopi conmocion. Usuarionan di rednan social y medionan di comunicacion local a comparti informacion di e hoben cu speransa cu lo por hay’e sano y salbo. Ayera mainta, Cuerpo Policial a informa cu e hoben “a yega tera back”.

Manera reporta den medionan local, e hoben di 21 aña di edad tabata cu su amigonan den area di Fisherman’s Hut, y a subi core jet ski. Na dado momento su amigonan a perde bista di dje, y usando otro jet ski, a busk’e den e area, sin resultado. A busca den diferente direccion pero no a logra topa cu e hoben. Pa alrededor di 5:30pm, a alerta autoridadnan di e suceso. Wardacosta Region Caribe a informa cu tabata pa aproximadamente 3or di atardi cu e hoben a sali for di Fisherman’s Hut y no a refresa.

Despues di bahada di solo, Wardacosta y Marina Real a manda helicopter y metalshark pa inicia un accion di buskeda y rescate, pero sin resultado. Tambe a emiti un aviso na barconan den e area tocante un persona cu ta perdi, pa asina nan tambe por ta alerta. E helicopter di Marina Real a logra mira e jet ski mas o menos 5 miya leu di costa, pero no tabatin niun hende riba dje. Na final di diadomingo anochi, a pausa e buskeda cu intencion pa reanuda esaki dialuna mainta.

Afortunadamente, dialuna mainta a habri cu e bon noticia cu e hoben, identifica den prensa local como Angel Cedeño, a “yega tera back.”

“Madruga pa mas o menos 2:50, Central di Polis a wordo informa cu e mucha homber perdi a yega tera back,” Cuerpo Policial a bisa den un comunicado di prensa. “El a wordo hiba pa hospital. Su situacion ta bon.”

Wardacosta di Region Caribe den un comunicado di prensa a informa cu Cedeño a landa mas di 8 ora pa yega tera back, y a confirma cu el a bay hospital pa ricibi atencion medico.

Perdi riba lama: Kico mester haci?
 Mientras cu e caso aki tabatin un resolucion positivo, e situacion a hala atencion riba medidanan di seguridad y sobrevivencia den casonan di emergencia riba lama. Diferente experto ta duna varios tip cu por yuda den caso di emergencia.

Den caso cu haya un accidente riba lama – sea a cay for di e jet ski of esaki a stop di traha – lo prome cu mester haci ta mantene calma. Purba di hala rosea, keda trankil y evita panico.
Despues, por cuminsa evalua e situacion. Check si tin herida, y si e vest salbabida ta traha bon. Keda riba e jet ski pa scapa energia y no hundi den lama. Keda riba e jet ski por parce dificil den un situacion asina, pero den caso di Cedeño, autoridadnan di rescate a haya e jet ski, cu ta lanta e pregunta si den caso cu e persona keda riba dje, ta mehora su chens di rescate.

E siguiente etapa ta señal pa pidi ayudo. Den caso cu tin señal di celular, yama servicio di emergencia manera wardacosta (913) of otro servicio di emergencia.

Si tin un ‘personal locator beacon (PLB) of radio VHF, activa esaki pa manda un señal.

Despues, por cuminsa pensa di aumenta bo chens di ser haya. Observa horizonte pa mira unda tin tera, y busca señal manera parha bulando den un direccion particular, loke por señala cu tin tera cerca.

Observa e color di awa, nota si e ta bira color mas cla, loke por indica awa menos hundo y cercania na tera.

Atrobe, expertonan ta enfatisa cu ta miho pa keda cu e jet ski. E jet ski (of waverunner of SeaDoo) ta bay ta mas facil pa rescatistanan por mira compara cu un persona den awa, y alabes, e por yuda pa flota y duna un tiki proteccion.

Finalmente, purba di hancra si ta posible. Si tin un anker y awa no ta mucho profundo, hancra e jet ski pa preveni cu e ta sigui drif. Esaki tambe lo yuda rescatistanan haya bo ubicacion exacto.

Esaki ta conta pa otro tipo di obheto riba lama, manera kayak, paddle, etc. Esaki pasobra keda riba dje ta aumenta visibilidad. Esaki por hacie mas facil pa rescatistanan haya e persona desaparecido, specialmente den condicionnan dificil manera ora tin mist of solo demasiado fuerte.

Importancia di preparacion

Prome cu tur cos, preparacion ta esencial. Cumpli cu tur medida di seguridad prome cu subi lama, incluyendo aparato di comunicacion, señal y seguridad. Den caso di Cedeño, e hecho cu e tabatin su vest salbabida bisti por tabata e factor determinante den su sobrevivencia. Bisti e ekipo protectivo corecto ta un stap den garantisa seguridad riba jet ski. Ademas di e vest salbabida, cu ta e pida di ekipo mas importante cu mester, por considera ekipo pa protege wowo di solo y awa di lama, manera bril of goggle. Tambe un helmet por ta crucial. Maske hopi biaha no ta bisti un, esaki ta protege cabes di un potencial golpi causa pa caida of colision. Scoge un cu ta diseña pa watersport.

Tambe por inverti den aparato cu ta yuda keda conecta. Herment manera radio VHF ta util den caso di emergencia, pasobra ta permiti pa conecta cu otro boto of servicio di emergencia den caso cu no tin señal di celular.

Aparato di GPS tambe ta importante. Esakinan ta yuda nabega awanan desconoci di manera safe, y por yuda haya bo caminda back den caso cu ta perdi.

Otro punto importante ta visibilidad. Paña di color yamativo ta mehora bo chens di ser mira pa otronan. Colornan manera geel, oraño of berde neon ta sobresali riba awa, haciendo mas facil pa otronan mira bo for di un distancia leu. Paña cu tin elementonan reflector ta aumenta visibilidad principalmente den anochi of tempo nubia.

Banda di paña, ekipo confiable pa emiti señal ta indispensable den caso di emergencia. Spiel pa señal ta facil pa usa, ya cu nan por gara e rayo di solo y manda señal di emergencia den distancianan largo, alertando otronan di bo presencia. Flares tambe ta util, specialmente den situacion unda mester haya atencion rapidamente. Ta recomendable pa pone esakinan den un tas waterproof.

Na final di dia, tur e precaucion no ta suficiente pa evita un emergencia riba lama, pero si por hunga un rol den e rescate y sobrevivencia di un persona.