Un grupo di manifestantenan, den su mayoria comunidad di color scur, ayera diabierna a manifesta contra e reciente masacrenan na e pais cu tambor dilanti di Fiscalia Colombiano na Bogota, pidiendo autoridadnan pa e resultado di e investigacionnan y ayudo pa enfrenta e efectonan di pandemia Covid-19.

“Nos ta akinan pa exigi un contesta pa cada un di e asesinatonan y pa wak con e investigacion ta bayendo”, Yasir Moreno, ken ta forma parti di organisacion di afrodescendiente di Bogota, a bisa.

Colombia den ultimo simannan ta e escenario di nuebe matansa cu a kita e bida di 43 persona, pa lo cual e Gobierno a nombra un ekipo special cu lo investiga e hechonan cu a tuma luga na departamentonan di Nariño, Valle del Cauca, Arauca, Antioquia, Cauca y Norte de Santander.

Segun Moreno, organismonan di estado no ta cumpli cu e labor di investiga e varios matansa, aunke Gobierno a anuncia ayera e detencion di dos presunto autor di e asesinato di cinco adolescente na Cali.

Durante e protesta, e hobennan a compaña nan peticionnan pa Gobierno Colombiano cu musica y borchinan cu tabata bisa ‘Nos ta exigi nos ayudo humanitario awor’; ‘No mas racismo, tur nos ta igual y nos tin e mesun derechonan’.

Stella Cortes, otro manifestante a sigura cu entre e varios motibo pa violencia ta e racismo y abandono di estado pa comunidadnan.

Di loke ta trata e matansa, Cortes a lamenta cu awor “nos no sa kico ta pasando realmente ni ken ta matando nos hobennan”.

Oranan prome cu e protesta, autoridadnan a anuncia e captura di dos agente di siguridad como presunto autor di e matansa di cinco hobennan cu a sucede 11 di augustus pasa na un plantacion di caña pafo di Cali.

 

 

 

LEAVE A REPLY

Please enter your comment!
Please enter your name here