Diabierna merdia, Minister di Finansa, Asuntonan Economico y Cultura, Xiomara Ruiz-Maduro tabata na Commandeur Pieter Boer School na San Nicolaas pa haci entrega di certificado na e hobennan cu a participa na Kidspreneur with Big Ideas.
E seccion IDEA di Departamento Economico a percura pa e hobennan di Tra’imerdia San Nicolaas na Commandeur Pieter Boer School haya diferente curso con pa haci negoshi. E hobennan a siña planta, traha carchi, pinta cuadra y boter y traha wrap, pa asina siña con pa traha diferente producto cu nan por bende despues. Dentro di poco lo tin un Bazaar na unda e hobennan por bay bende nan producto y demostra nan talento como comerciante.
Ruiz-Maduro ta gradici tur tanchi y omo di Tra’imerdia San Nicolaas, IDEA y Commandeur Pieter Boer School pa e bunita proyecto aki. Ruiz-Maduro a keda masha contento y ta bisa danki pa e paspoort bunita cu ela haya pa drenta ‘klantrijk’ sin problema.
