“Nos hobennan ta traha di diamante y oro, pero nan no a haya chens pa briya ainda. Tur di nan ta aki cu potencial inmenso cu nan no a explota ainda, pasobra nan ta traha pa ta fenomenal y no simplemente ‘bon’.”

Manera ta conoci rond mundo henter, hoben studiantenan tin dificultadnan pa scoge cua estudio nan lo kier tuma. Apart di tin presion pa scoge algo cu nan lo kier eherce pa resto di nan bida, hopi studiante sa tin presion pa scoge careranan mas tradicional manera abogacia, medico of economista. Esaki entre otro ta bin pa e preocupacion di tanto e studiante mes como famia, pa scoge algo cu lo por ofrece miho oportunidadnan economico, pues un carera cu ta lucrativo.

Inspiracion personal
Pero esaki no semper ta e caminda cu ta miho pa e studiante. Asina Jalken Antonia ta conta Bon Dia. Sr. Antonia kende den su carera como studiante a scoge pa studia economia di empresa y accounting, ta mira atras cu sentimentonan mixto. Despues di basta tempo di traha den e mundo empresarial, e ta mira cu aunke e mundo ey ta special, su curason no tabata den esey completamente. Sr. Antonia a traha pa 5 aña pa un compania grandi di accounting.

Actualmente su persona tin tempo afo di e mundo ey y ta trahando cu hobennan cu mescos cu ne no tabata sigur kico nan lo kier bira, menos si nan ta haciendo e escogencia corecto na momento di dicidi kico pa studia. E pregunta central cu e mes a puntra su mes 20 aña pasa, esta ‘ken mi ta y dicon mi ta haci loke mi ta haci?’, e ta urgi pa hobennan puntra nan mes.

Sr. Antonia a nace na Aruba y e tin un programa pa yuda hobennan di 16 aña te 33 aña na Hulanda, cual e lo kier expande pa otro paisnan pero muy en special na Aruba. “Mi a yuda studiantenan Hulandes, Marocano, Antiano na Hulanda, awo mi kier haci algo pa mi propio hendenan aki mes.”

Motivacion y oportunidad pa hoben

Cu su compania y fundacion Ja Ik BV, pa e ultimo 3 añanan sr. Antonia ta yudando studiantenan na Hulanda por medio di coach nan pa motiva nan mes y ‘realisa cu nan ta personanan cu talentonan inmenso cu simplemente ta wardando pa nan explota nan’.

Esaki sr. Antonia ta haci por medio di coach hobennan cu nan careranan, pa asina nan ser conoci miho cu nan cualidadnan positivo cual nan no a haya chens pa luci te ainda. Ademas di esaki e ta purba motiva hobennan pa realisa cu ‘nan ta traha perfectamente y nan tin tur e hermentnan cu nan tin mester den nan caba’.

Ademas ta hiba hobennan riba tournan di inspiracion unda nan ta haya chens di explora con un cierto carera lo ta di banda di e persona cu tin experiencia den e carera aki caba. Por ehempel, studiantenan cu ta studia management ta haya chens di bishita un banco of otro compania unda nan ta haya chens pa ta den contacto cu profesionalnan.

”Hopi biaha nos ta mira cu un manager ta duna feedback y e studiantenan cu nan a haya tin hopi potencial nan ta pidi pa haci un stage na nan compania, of ta simplemente keda den contacto pa sa con ta bayendo cu e ne.”

Sr. Antonia por mira cu su metodonan y su ekipo ta trece resultado pa hobennan, mirando cu actualmente nan ta guiando casi 800 hobennan na Amsterdam, Den Haag y Rotterdam.

Nos Rubiano ta fenomenal’
P’esey e kier trece e programa aki na Aruba pa asina yuda hobennan di Aruba cu segun cifranan tambe ta experiencia dificultad cu scoge e estudio corecto, manera por mira di e cantidad di studiante cu ta cambia di estudio na Hulanda.

”Rubianonan pero tambe por ehempel un Colombiano cu a crece aki tin talentonan inmenso. Nos ta hendenan asombroso, casi tur di nos tin conocemento di 4 lenguahe. Esey bo no ta tende casi na mundo. Pero mi ta kere nos potencial ainda no a haya chens pa briya. Si bo mira rond mundo hende no conoce nos hopi, pero nos ta digno pa haya reconocemento cu e talento cu tin scondi den nos.”

Sr. Antonia cu su filosofia di ‘bo curpa ta e compania di bo ser’, ta spera cu pronto hobennan haya un bon caminda tanto den mundo academico como mercado laboral.