Cornelio Antonio Hermanus ta e unico persona cu ta sintando un castigo di bida largo den KIA. El a ricibi e sentencia aki na 2006 despues di a comete su di tres asesinato, di cual e ultimo a tuma luga na Aruba. Cumpliendo casi 20 aña cera Hermanus a presenta un peticion pa libertad, conforme cu ley di Aruba cu ta permiti un condenado di bida largo pa pidi revision di su situacion legal despues di sinta minimo 20 aña detencion.
E peticion a ser trata ayera pa Hof, unda e proposito principal di e audiencia tabata pa evalua si Hermanus mester keda mas tempo cera of si tin posibilidad pa e ser pone den libertad bao condicionnan estrictamente defini. Durante e audiencia, Hof a enfatisa cu e proceso ta uno delicado y cu e decision no ta algo cu por ser tuma ligeramente, teniendo na cuenta e gravedad di e delito, e impacto riba e famia di e victima y e seguridad di sociedad.
Prome cu e asesinato cometi na Aruba, Hermanus ya tabata condena pa dos asesinato cu el a comete anteriormente na Hulanda. Pa e prome asesinato el a haya castigo di cuater aña di prison, mientras cu pa e di dos el a ricibi un sentencia di seis aña. E tercer asesinato a sigui un trayecto legal mas severo, culminando den un condena di bida largo.
Durante e tratamento di e peticion, Hof a ricibi y analisa diferente rapport psicologico y psikiatrico, como tambe evaluacion y consehonan di Centraal College Reclassering. Ademas, Hof a ricibi tambe un carta di parti di e famia di e victima, cu tabata expresa nan punto di bista riba e posibilidad di libertad di e condenado. Hof a remarca cu tur e documentonan ricibi ta parti di un proceso mas amplio di evaluacion cu a cuminsa na 2024, specificamente enfoca riba e preparacion pa tratamento y e analisis di e peticion di Hermanus.
E rapportnan a enfoca riba varios aspecto importante, entre nan e posibilidad di reintegracion di Hermanus den sociedad. Diferente instancia a evalua su comportamento, su actitud, su desaroyo personal durante su detencion y e riesgo potencial cu e por representa si ser poni den libertad.
Hof a splica cu pais Aruba tin un responsabilidad legal y humano pa mira e posibilidadnan cu un condenado por tin pa desaroyo personal, reintegracion y pa eventualmente por biba un bida funcional den sociedad. Sinembargo, Hof tambe a subraya cu e proceso no ta pasivo. Segun e hues, Hermanus no por sinta man cruza y spera cu e decision ta cay for di shelo. Un parti substancial di e proceso ta depende di su propio cooperacion, esfuerso y disposicion pa traha riba su mes.
Hof a indica cu si e peticion actual no ser aproba, Hermanus tin derecho pa presenta un peticion nobo despues di cinco aña. Esaki ta conforme e marco legal vigente, cu ta establece oportunidadnan pa revision.
Procurador General (PG) di Ministerio Publico a expresa claramente cu no ta momento pa evalua e peticion di libertad di e condenado. Segun PG, un proceso manera esaki mester ser trata cu tempo, paso pa paso, y riba base di informacion suficiente y actualisa. PG a enfatisa cu condicionnan pa libertad mester ta solido prome cu e condenado por sali, y segun su evaluacion, no a yega na e punto ey ainda.
Un aspecto cu PG a subraya como fundamental ta e tema di vivienda. Aunke vivienda ta un factor crucial pa reintegracion, PG a indica cu ainda no a haci tur e stapnan necesario pa determina si e lugar unda Hermanus potencialmente lo biba ta adecuado, si e programa di supervision ta cla, y si e bario unda e vivienda ta situa lo acepta su presencia. Segun PG, e claridad riba e aspectonan aki ta indispensable prome cu libertad por ser considera.
Pa e motibonan ey, PG a pidi oficialmente pa pospone e tratamento y evaluacion di e peticion te na mei, pa por haya mas informacion relevante. Abogado di e condenado, Desiree Croes, a confirma cu el a papia cu su cliente riba e situacion. Segun e defensa, Hermanus ta compronde cu aunke personalmente ta sinti cu e lo por sali y ta prepara pa biba na cas, e proceso ta delicado y mester ta sigur cu tur condicionnan ta bon defini y solido prome cu un decision por ser tuma.
Durante e audiencia, Hof a enfatisa e importancia pa tur instancianan cu tin responsabilidad den guia y yuda e condenado ta realmente trahando hunto. Ademas el a subraya cu mester tin un programa structura of stapnan claramente delinea pa e lunanan binidero, cu ta indica e puntonan y aspectonan cu Hermanus mester traha riba dje.
PG a remarca cu instancianan relevante ta colabora y cu lo traha riba e puntonan concreto cu e condenado mester aborda. Na mesun momento Hof a enfatisa cu ta importante pa Hermanus ta consciente di su propio situacion, pa mira su mes honestamente y pa reconoce e areanan cu e mester sigui traha riba dje pa su propio bienestar y pa seguridad di sociedad.
Segun un di e rapportnan psikiatrico, un preocupacion importante ta cu e condenado no ta mustra suficiente sentido di culpa pa loke el a haci y cu e no ta asumi responsabilidad completo pa su actonan. Hof a subraya cu esaki ta un aspecto crucial cu mester ser trata, pasobra sin e reconocimento di culpa y sin cu e condenado aumi responsabilidad, ta dificil pa e funciona adecuadamente den sociedad.
Un otro punto di preocupacion di Hof ta e capacidad di Hermanus pa maneha conflicto si acaso e ser pone den libertad. Hof a indica cu e mester siña y mester ricibi training con pa maneha conflicto di forma pacifico, pasobra e meta principal ta pa evita cu situacionnan violento di pasado no ser ripiti. Hof a recorda cu ambiente den KIA ta fundamentalmente diferente di sociedad, pasobra den prison tin supervision constante, algo cu no ta existi mescos den bida liber.
PG a informa cu nan ta bay cuminda cu trainingnan specifico den KIA pa yuda y guia Hermanus den e aspecto di maneho di conflicto.
Durante e audiencia, Hermanus mes a haya oportunidad pa papia. El a declara cu e ta reconoce cu e mester ayudo di berdad y cu tin hopi cos cu el mester siña atrobe, specialmente considerando cu el a pasa hopi aña detencion. El a bisa cu nunca e no a haya conflicto durante su tempo den KIA y cu su deseo pa sali liber tambe ta liga cu su estado di salud, cu segun el a splica ta deteriora.
Hermanus a pidi pordon publicamente na famia di e victima y na corte, y a confirma cu e a manda carta tambe pidiendo pordon na e famia di e victima.
Tocante e observacion den e rapport cu e no ta tuma responsabilidad completo pa su hecho, Hermanus a expresa cu e tin dolor pa loke a pasa y cu e situacion no mester a pasa. Sinembargo, Hof a mantene su preocupacion riba e riesgo potencial cu e condenado por representa den sociedad, un ambiente cu ta carece e nivel di control y supervision cu tin den prison.
Den e rapportnan tambe a ser menciona cu Hermanus a nenga anteriormente di participa den tratamento of terapia cu psicologo Na esaki, un psicologo di KIA presente durante e audiencia a splica cu, e tempo ey, Hermanus a pensa cu e lo keda deteni pa bida, y p’esey e no tabata mira utilidad di participa den tratamento. Sinembargo, awor cu posibilidad di libertad ta riba mesa, su actitud a cambia y tin un motivacion mas grandi pa participa activamente.
Segun e psicologo, ya tin progreso cu a ser logra y tin potencial pa mas desaroyo den futuro. El a agrega cu participacion di Hermanus den e programa por resulta beneficioso pa su proceso di reintegracion.
Na final di e audiencia, Hof a conclui cu e tratamento y evaluacion formal di e peticion no lo tuma lugar ainda, pasobra mester mas informacion. Hof a enfatisa cu ta di gran importancia pa Hermanus continua cu e programa, plan y trainingnan, y a enfatisa cu su cooperacion ta esencial pa por yega na un evaluacion exitoso y completo.
E caso a ser posponi te cu 31 di augustus. Na mei lo tin un evaluacion intermediario, unda PG lo tene Hof informa riba con e evaluacion ta bay, kico ta e resultado di e programa y trainingnan cu e condenado ta sigui na e momento ey. Hof ta spera di ricibi rapportnan actualisa di tur esnan cu ta yuda y guia Hermanus, asina tambe informacion riba e plannan futuro.
Hof a determina cu tur e rapportnan mester ser entrega no mas tarda cu dos siman prome cu 31 di augustus, pa por permiti un evaluacion completo y fundamenta di e situacion di Cornelio Antonio Hermanus.
