HOH ta confirma: A cera aplicacion HiX como medida preventivo, reapertura anticipa den simannan binidero

Horacio Oduber Hospital (HOH) a confirma cu e aplicacion di HiX pa pashent ainda no ta disponibel, despues cu hospital a cera tur portalnan di HiX temporalmente como medida preventivo relaciona cu e atake cibernetico cu a afecta ChipSoft na Hulanda na april. Segun HOH, no tin indicacion cu e sistema na Aruba ni data di pashentnan a ser afecta pa e atake. Actualmente team di ICT di hospital ta haciendo e ultimo testnan necesario pa por bolbe habri e portal y aplicacion.

Bon Dia Aruba a publica recientemente un articulo tocante funcionamento di e aplicacion HiX na Aruba, despues cu un pashent a indica cu anteriormente e tabatin acceso na su informacion medico via e aplicacion, pero cu despues esaki no tabata posibel mas. E situacion a lanta pregunta tocante si e problema di acceso tabata relaciona cu e atake cibernetico cu a tuma lugar cerca ChipSoft na Hulanda y cual tabata e situacion actual di e aplicacion na Aruba.

Pa haya mas claridad, Bon Dia Aruba a acerca Horacio Oduber Hospital cu varios pregunta tocante funcionamento di HiX, seguridad di informacion di pashentnan y disponibilidad di e aplicacion.

Contestando e preguntanan, HOH a indica cu, manera nan a informa anteriormente, e aplicacion HiX mes no tabata forma parti di e hack cu a sucede na april na Hulanda.

Segun hospital, e atake cibernetico a tuma lugar cerca ChipSoft na Hulanda. Sinembargo, e sistema di HiX cu HOH ta uza na Aruba ta instala localmente na e Datacenter di Setar NV y ta ser maneha pa e team di ICT di HOH.

E distincion aki ta importante, ya cu ChipSoft ta e compania Hulandes tras di HiX, un sistema digital cu ta ser uza den sector di cuido medico pa maneho di informacion y procesonan relaciona cu pashent. Pa pashentnan, acceso digital na un sistema asina por facilita consulta di informacion medico y otro datonan relaciona cu nan cuido. Consecuentemente, ora acceso na e aplicacion no ta posibel, esaki por naturalmente lanta pregunta tocante e motibo y seguridad di e informacion cu ta ser procesa den e sistema.

HOH a confirma cu te dia di awe no tin ningun indicacion cu e atake cibernetico na Hulanda a afecta hospital na Aruba den ningun forma. Tampoco, segun hospital, tin indicacion cu informacion of data di pashentnan na Aruba a ser afecta como consecuencia di e incidente.

Aunke HOH ta indica cu su sistema local no a ser afecta, hospital si a dicidi di tuma accion inmediatamente despues di haya señal di e incidente na Hulanda. Como medida preventivo, HOH a cera tur portalnan di HiX temporalmente, incluyendo e aplicacion destina pa pashentnan.

E decision di mantene e portalnan cera ta forma parti di medidanan preventivo cu hospital a tuma mientras su departamento di ICT ta traha riba e sistema. Segun HOH a splica, ademas di e medida preventivo relaciona cu e incidente na ChipSoft, tabatin algun actualisacion di seguridad cu hospital a probecha e periodo pa implementa.

Den e periodo aki HOH tambe a introduci un version nobo di HiX, cu segun hospital ta brinda mas seguridad pa e sistema y data di pashentnan. Esaki ta specialmente importante den sector di salud, unda proteccion di informacion medico ta esencial. HOH ta enfatisa cu no tin indicacion cu e incidente na ChipSoft a afecta data di pashentnan na Aruba.

Na mesun momento HOH a informa cu actualmente su team di ICT ta haciendo e ultimo testnan necesario prome cu por bolbe habri e portal y aplicacion di pashent. Hospital no a menciona un fecha exacto pa reapertura, pero a indica cu ta spera cu esaki por sucede den e simannan binidero. “Asina cu e aplicacion ta disponibel y cla pa ser uza pa nos pashentnan, HOH lo informa debidamente,” hospital a indica.