Diasabra mainta Aruba a keda conmociona pa e suceso lamentabel caminda un homber a fayece na Coba Lodo. Segun informacion un pelea entre dos primo a termina den un tragedia na momento cu un di e primonan a los tiro riba e otro y a kita su bida.

Mediante un comunicado di prensa oficial Cuerpo Policial di Aruba (KPA) a informa cu diasabra mainta pa 6:07 central di polis a ser informa di un caso cu a tuma lugar dilanti un cas na Coba Lodo y cu lo a scucha tironan.

Segun KPA e prome informe cu a drenta tabata cu un hende homber tabata band’i caminda tira y no tabata reacciona. Central di Polis ta despacha patruya y ambulance cu maximo urgencia na e sitio.

Na yegada polis a topa cu un persona masculino benta band’i caminda na suela y no tabata duna señal di bida. Na momento cu ambulance a yega na e sitio lamentablemente no por a haci nada mas pa e victima. Dr. Voskuil ta constata morto di e victima e hende homber Rene J. Paesch naci na Aruba 30 december 1990 (34 aña).

E curpa a ser tuma den beslag y recherche a inicia investigacion pa asina haya sa kico exactamente a sucede. KPA no a confirma oficialmente door di kico e victima a fayece, ya cu investigacion lo mester saca esaki afor.

Na e sitio a detene un hende homber relaciona cu e caso aki y a confisca un auto y un brommer pa mas investigacion.

Segun informacion di medionan di comunicacion presente, e victima cu a fayece a ser tira pa su propio primo, informacion cu no a ser confirma oficialmente pa KPA. Kico realmente a sucede no ta conoci, pero e sospechoso Israel Peasch tabata ser busca pa su involucracion den e caso.

Diasabra den oranan di atardi un medio di comunicacion local a duna di conoce cu e sospechoso Israel lo bay entrega su mes, pero prome cu esaki a realisa un entrevista live cu e sospechoso pa e a duna “su banda di medaya” tocante kico a sucede cu a conduci na e tiroteo cu a resulta den e fayecimento di su mesun primo.

Comunidad ya tabata den shock pa e suceso lamentabel aki, y na momento cu e medio di comunicacion a haci entrevista live cu e sospechoso Israel Peasch, comunidad di Aruba a reacciona y a cuestiona e decision di e medio di comunicacion pa bay live cu un sospechoso cu tabata fugitivo na e momento ey y tabata ser busca pa autoridad.

“Awe medio di comunicacion a pasa tur limite. Un asesino a ricibi plataforma LIVE pa purba limpia su man despues di tuma bida di un otro. No tin “defensa propio” cu un arma cu ley no ta permiti. Duna palabra na un criminal asina ta compromete e seguridad publico. Cu e tipo di cobertura aki, ta normalisa matamento, ta sensacionalisa violencia, y ta habri porta pa otro pensa cu, tin un arma, y mata hende ta un manera pa soluciona un problema. E cos aki no ta Prensa, e ta iresponsabilidad. Ta pone e comunidad na peliger,” un ciudadano preocupa a publica reaccionando riba e entrevista en cuestion.

“Limite a pasa masha dia caba! Para banda di un criminal y dun’e plataforma pa haya pueblo na su banda, y lanta hende contra polis bisando cu ta bay babysit e pa polis no batie,” otro usuario a comenta.

“Prome ta filma hende halando nan ultimo rosea te na awo, sinta den auto ta entrevista un fugitivo! Tur cos sin etica pa views,” un usuario a publica, recordando cu den pasado ya caba e medio di comunicacion a publica un video live di un adicto ambulante cu herida di tiro cu na final a fayece.

Otro ciudadano a splica den su comentario y reaccion: “Prensa tin ora ta pasa e linea. Corda bon, e meneer ey ta FUGITIVO di ASESINATO. Ciudadano ta autorisa pa detene e persona aki y pa entreg’e di inmediato na Polis. Aki Prensa a ” SCONDE” e FUGITIVO unda cu Husticia tabata busca e asesino aki. Pues Prensa lo mester tabatin e ASESINO FUGITIVO scondi y proteha pa un periodo di tempo pa prensa lo por a prepara un testimonio controla y bunita. E espacio aki ta forma parti di e SCONDEMENTO di e Fugitivo pa Husticia den mi concepto. Si Ministerio Publico mira e video aki, e lo por saca un som di cu 1+1=2.”

Prensa liber ta un instrumento di comunidad. No solamente pa nan ta bon informa, sino pa canalisa y busca cierto contesta riba nan inkietudnan y preocupacionnan, pero ciudadanonan ta cuestiona unda ta pinta e liña cora di etica, profesionalismo y responsabilidad pa prensa.

Na 2022 Orden di Abogado di Aruba sugeri pa bin cu un Codigo di Conducta pa periodista, mirando desaroyo di e situacion di medionan di comunicacion na Aruba.

Orden di Abogado di Aruba a constata cu tin cambio a tuma lugar, di periodismo clasico, unda noticia principalmente ta ser treci pa publico den forma descriptivo y den imprenta, pa un periodismo mas moderno digital, cu mas tanto material audiovisual.

Den mayoria caso un periodista kier ta e promer pa bin cu un noticia y pa publica esaki mas liher posible (online). Orden di Abogado ta haya importante sin embargo pa indica cu den e pura ey no mester ignora e evaluacion di interes cu reporteronan mester haci den e manera di publica.