(AFP)—Un tata sospecha di a hinca y mata cuatro di su propio yiu durante un atake violento cu a cobra nuebe bida den e capital di Surinam a comete suicidio den prison, segun polis a bisa dialuna.

E atacador di 43 aña, identifica solamente cu e inicialnan D.A., a horca su mes den un cel di stacion di polis den e pais chikito riba costa norte di Sur America, segun un declaracion di polis.

E homber tabata aparentemente sufri di problema di salud mental y cuatro di su yiu—di edad entre cinco y 15 aña—a muri den e atake cu a pasa durante oranan di anochi diasabra pa diadomingo den y rondona di su cas, segun hefe di polis Melvin Pinas.

Entre e otro personanan cu a muri tabatin, segun reportahenan, e welonan di e muchanan y un otro yiu.

Segun medio local, e sospechoso a discuti cu su esposa riba telefon prome cu el a hinca un di e victimanan, su yiu muher di 11 aña, 44 biaha den cushina di nan cas.

Polis a bisa cu e homber a keda herida na su pia na momento di su aresto y a ser hiba hospital, despues a ser traslada pa un cel di polis diaranson anochi.

Nan a haya su curpa sin bida dialuna mainta.

Dos otro persona cu a keda herida a keda hospitalisa.

Minister di Husticia y Polis, Harish Monorath, a bisa radio local ABC cu despues cu a move e homber for di hospital pa cel, nan tabata vigilando e di cerca.

“Tabatin un momento unda no tabatin ningun hende presente y el a colga su mes,” segun e minister, agregando cu e ta spera mas informacion tocante con e homber a logra suicida mientras e tabata bao custodia.

Monorath tambe a duna mas detaye riba e atake.

“Segun nos informacion, tur cos a cuminsa na cas. Dos yiu a logra sali,” y a yama nan wela na otro banda di caminda, segun el a bisa.

“E wela y welo a bay yuda, cu consecuencianan fatal pa nan,” e minister a agrega.

Despues, e homber a mata personanan den un otro cas y mientras e tabata na caminda pa un otro luga, polis a par’e y arest’e.

Presidente di Surinam, Jennifer Geerlings-Simons, a reacciona riba e matansa riba su pagina di Facebook.

“Na un momento unda famia y amigonan mester ta hunto y sostene otro, nos ta enfrenta e realidad duro cu tin un otro banda di mundo,” el a skirbi.

“Den un momento unda famia y amigonan mester ta uni y sostene otro, nos ta enfrenta e realidad duro cu tin un otro banda di mundo,” el a skirbi. “Un tata cu a tuma bida di su propio yiu y, den e proceso, tambe a mata su bisiñanan. Mi ta desea tur esnan cu ta den luto hopi forsa, curashi y consuelo den e momento inimaginablemente dificil aki.”