Weekend ultimo, un usuario di rednan social a comparti un video, indicando cu e persona cu ta aparece riba e video tabata sacando potret y video di muchanan chikito cu tabata riba e beach. Na momento cu polis a yega, sinembargo, ya e homber a core bay.

Usuario di Facebook, K.G. a comparti e video, den cual por mira un homber ta purba di bandona e sitio riba bicicleta, rondona pa usuarionan di beach. Hunto cu e video, el a conta cu e tabata hunto cu algun amigo na banda di lama, caminda tur hende tabata cu nan yiunan, y e mucha homber cu bo ta bay mira riba bicicleta a cuminsa tuma potret y filma e yiunan chikito hopi cerca. El a continua bisando cu ora e mamanan a nota kico e homber tabata haci, nan a dicidi di bay confronta e homber y a kita su telefon.

Segun K.G., den e telefon nan a haya 8 video di e yiunan chikito mientras nan tabata hunga den lama. A yama polis mesora, pero mesora e homber a core bay for di e sitio.

“Polis a tuma nota di loke nos a bisa y a bay busca e persona,” K.G. a skirbi. El a clarifica cu nan mes no a detene e homber pasobra nan a yama polis, sinembargo, e homber a core prome cu polis a yega.

E video aki a hala hopi atencion den comunidad local, y a ser comparti centenares di biaha.

Mayoria di usuario tabata preocupa cu e homber grabando e muchanan na beach lo ta un pedofiel, of cu lo ta grabando pa pasa e informacion aki na traficadornan di hende, cu despues lo por organisa un secuestro of otro crimen contra e muchanan.

Algun usuario a propone cu e homber por tabata saca potret sin intencion di maldad. Sinembargo, otronan a descarta esaki, na prome lugar pasobra “si e no tabata haciendo nada malo, e no lo a core.”

Ademas, a enfatisa cu si kier saca potret di mucha pa cualkier motibo, mester pidi permiso na e mayornan prome. Y si e mayornan no ta na e sitio, e ora simplemente no por saca potret di e muchanan.

Otronan a bisa cu nan lo a tuma husticia den nan propio man si nan lo a haya nan mes den un situacion asina.

Bon Dia Aruba a tuma contacto cu vocero di polis, Liliana Rasmijn, pa puntra tocante e caso aki. A puntra si polis a ricibi un keho den e caso. Tambe a puntra si ta legal pa adultonan graba mucha na lugarnan publico manera beach, y si mayornan haya nan mes den un situacion manera esaki, kico nan mester haci?

Sinembargo, te ciere di e edicion aki, no a ricibi un contesta.

Tin informacion limita cu por duna un tiki contexto den e situacionnan aki. Mientras ta parce cu ley di Aruba no tin un prohibicion explicito contra saca potret of video di mucha den areanan publico, tin diferente ley y maneho cu ta destina pa protege muchanan.

Aruba a implementa e Codigo di Proteccion di Mucha desde april, 2021. E codigo aki ta duna un maneho structural pa profesionalnan den area social, hudicial, di salud y di educacion atende casonan sospecha di abuso di mucha. Maske e no ta regula specificamente potret of video, si e ta subraya e importancia si salvaguardia derecho di mucha y nan bienestar, y di preveni cu abuso por tuma lugar. Den e caso aki, comportamentonan sospechoso di adulto pa cu mucha por cay den e alcance di e Codigo di Proteccion di Mucha.

Otro aspecto ta e ley di proteccion di derecho di autor na Aruba, “Copyright.” Esaki ta trata cu derecho riba potret. Generalmente, e ta permiti pa publica potret no-comisiona, pero no ora e persona den e potret ta demostra un interes rasonable den opone e publicacion. Por extende e provision aki pa mucha, specialmente si ta usa e imagennan den contexto cu por bay contra nan privacidad of bienestar.

Finalmente, lo mas importante ta pa mayornan keda alerta y vigila nan yiunan ora ta den espacionan publico, y reporta cualkier comportamento sospechoso na polis y autoridadnan pertinente.