Manera cu ta conoci, dialuna mardruga 05.21 melding a drenta via CP cu un persona a wordo asesina na Jaburibari. Ora patrouille a yega na e sitio en berdad a constata un persona drumi ariba vloer cu no ta duna señal di bida. Dr Cime Texier a constata morto 07.00 y e curpa a wordo tuma den beslag door di fiscal Rammeloo. A drenta informacion prome cu e persona tabata di nacionalidad Chines, pero aworaki segun Ministerio Publico ta confirma, e homber ta un turista Canades. Mañan lo haci e autopsia pa determina motibo exacto di morto.
Un rato despues un persecucion a cuminsa na altura di McDonalds Palm Beach di un KIA Sportage numera V-966 cu na e momento di a wak patrouille pa un motibo of otro a pasa door di luz cora, treciendo bidanan di otronan na peliger, core bay nengando stopteken di polis y termina na altura di Aruba Bank Hato. Akinan 5 persona a wordo deteni, 3 masculino y 2 femenino. Durante persecucion un di personanan den e auto a tira un gran cantidad di biljetenan for di auto y probablemente mas cos. Na unda e biljetenan a wordo tira ariba caminda un cantidad a wordo tuma den beslag. Segun nos ta confirma, e detencionnan aki ta relaciona cu e caso di asesinato na Jaburibari anto a detene varios persona di nacionalidad stranhero, ningun local a wordo deteni. Ministerio Publico ta opta pa no comparti mas detaye pa awo.
Lo comparti mas informacion manera cu esaki ta obtenibel.
