(AP) — Un residente di estado di Washington, kende ya ta den custodia federal pa cargonan di arma y crimen di odio a keda acusa den un serie di candela intencional riba salonnan di reino di Testigonan di Jehova, segun autoridadnan a anuncia ayera.
Fiscal di Seattle, Nick Brown a bisa den un comunicado di prensa cu e cargonan nobo contra Mikey Diamond Starrett, 50, tambe conoci como Michael Jason Layes, ta parti di e esfuersonan di Departamento di Husticia pa combati crimen di odio, cual ta den aumento nacionalmente.
Starrett, kende ta describi su mes como un biologo di bida salvahe pa hopi tempo y cientifico di wetlands den documentonan di corte y riba su resume online, a keda aresta na september 2021 pa cargonan cu el a tira riba un salon di Testigonan di Jehova na Yelm, cerca di Olympia na 2018, y cu ilegalmente e tabata den posesion di un shotgun.
Fiscalnan a bisa cu na momento di su aresto, Starrett tambe tabata bao investigacion pa siete candela intencional na salonnan di Testigonan di Jehova na condadonan Pierce, Mason y Thurston di 2018 te 2020, incluyendo un candela cendi mientras tabatin hende paden. Investigadornan a desccubri seis arma, incluyendo e shotgun, ora nan a listra e cas unda e tabata kedando, nan a bisa.
Diamars ultimo, un gran hurado federal na Seattle a emiti un acusacion nobo pa tres di e candelanan na 2018 – un na un salon na Tumwater y dos na un salon na Olympia, incluyendo uno cu a destrui e edificio. No tin acusacion cu hende a resulta herido den e candela.
Starrett awo ta enfrenta tres cargo adicional di daño na propiedad religioso, cual ta un crimen di odio, y tres di usa candela pa comete un delito federal en conexion cu candela na salonnan di Testigonan di Jehova na Tumwater y Olympia na 2018.
