(AP) — Departamento di Seguridad Interno a bisa diaranson cu e ta kitando e limite di edad pa contratacion nobo den e agencia cu ta responsable pa cumplimento di ley di inmigracion, cu e meta pa amplia contratacion despues di un infusion grandi di fondo for di Congreso.
Segun un comunicado di prensa, e departamento lo elimina e limite di edad pa aplicantenan nobo pa “aun mas patriota por cualifica pa uni cu ICE,” e agencia cu ta responsable pa busca, aresta, detene y deporta hende cu ta den Merca ilegalmente.
E agencia ta den centro di e esfuersonan di administracion di Trump pa implementa e plan di deportacion masivo di presidente Donald Trump. Na comienso di verano, e Congreso a pasa un ley di gasto cu ta duna ICE fondo pa contracta 10.000 empleadonan mas.
Actualmente, aplicantenan pa ICE mester tin entre 21 aña y no mas cu 37 of 40, depende di e posicion cu nan ta aplica p’e. Den un entrevista cu Fox & Friends, Secretaria di Seguridad Interno Kristi Noem a bisa cu aplicantenan por tin desde 18 aña.
“Nos no tin mas un limite riba e edad bo por tin, asina cu desde 18 aña bo por inscribi pa ICE y uni cu nos. Nos lo entrena bo y prepara bo pa sali riba caya y yuda protege famianan,” Noem a bisa.
E departamento a bisa cu tur reclutado mester pasa un screening medico y di droga y completa un prueba di condicion fisico.
E agencia a promove e cambio di limite di edad riba red social cu tono entusiasta, presentando e esfuersonan di cumplimento di ley di inmigracion como no solamente patriotico sino tambe epico y cinematico.
Un di e postnan tabata acompaña cu un imagen cu parce un imagen di reclutamento, mustrando un hoben y adulto masculino, tur dos cu paña tactico estilo militar y arma, cu e palabra “NO AGE CAP JOIN ICE NOW” abao. “Nos ta trece ‘bonding’ di tata/yiu na un nivel completamente nobo,” e post a bisa.
Un otro imagen tabata un anuncio pa un Ford Club Wagon — un van grandi cu tabata popular pa cuanto hende por keda aden — cu e palabra: “Pensa cuanto criminal ilegal bo por mete den e bestia aki?”
Abao di e imagen tabata e pregunta: “Kier deporta ilegalnan cu bo ‘absolute boys’?” Absolute boys ta un termino di slang pa elogia un persona.
Anteriormente, ICE a anuncia un campaña di reclutamento pa busca y contrata oficialnan di deportacion, investigador y abogado cu e lo mester pa logra su meta di contratacion.
Como parti di e campaña, e agencia ta ofrece un bono atractivo te $50.000 pa reclutadonan nobo, como tambe otro beneficionan manera pago di prestamo estudiantil y hopi ora extra pa oficialnan di deportacion.
