Dia 16 di december 2020 ultimo Fundacion Lanta Papiamento (FLP) a celebra su Tertulia Virtual 2020. Un di e sorpresanan na final di e Tertulia tabata e homenahe na Ramon Todd Dandaré Mag. Ling.
Presidente di FLP, señor Eduard Pieters, a dirigi su mes na Señor Todd Dandaré cu tabata completamente sorprendi di e atencion special aki. E discurso di Señor Pieters a pone enfasis riba e balor di Ramon pa FLP y pa Aruba.
Ramon Todd Dandaré ta un di e fundadonan di Fundacion Lanta Papiamento. Fundacion Lanta Papiamento (FLP) a keda lansa dia 22 di mei 2009 cu e meta primordial di conscientisa pueblo di Aruba tocante Papiamento, idioma oficial y idioma nacional di Aruba, y idioma materno di e gran mayoria di e poblacion di Aruba.Su statutonan a keda oficialmente firma dia 21 di februari 2010. Ramon tabata un di e firmantenan.
Ramon tabata den e prome y di dos directiva. Apesar cu Ramon no ta den directiva mas, el a keda duna FLP su sosten. E ta colabora cu tur FLP su actividadnan, e ta duna conseho, e ta yuda nos pensa.Ramon t’ey sin falta!
Ramon ta un docente pasiona. El a traha na Colegio Arubano, na Instituto Pedagogico Arubano, na Universidad di Corsou y el a duna masha hopi curso y tayer tocante Papiamento. Te awe ainda, despues di mas di 50 aña, e ta duna les. E studiantenan tin masha aprecio pa nan Meneer Ramon.
Ramon su conocemento di Papiamento ta inigualabel. Cualkier cos, yama Ramon; bo ta haya un contesta of un solucion mesora.Su charlanan ta famoso.
Ramon ta contribui na nos literaturatambe como poeta. Ken no conoce su poema “Isla di Mi”?
P’esey y pa hopi motibo mas Fundacion Lanta Papiamento ta nombra RamonTodd Dandaré mag. Ling. Miembro Honorario di Fundacion Lanta Papiamento.
“Danki Ramon, pa bo fieldad, bo responsabilidad, bo pasion pa nos idioma Papiamento.”
Na nomber di FLP Señora Lulu a entrega Ramon e certificado cu ta confirma cu Ramon ta Miembro Honorario di Fundacion Lanta Papiamento.
