Ayera atardi e comision “Semper Tali” a ofrece un conferencia di prensa pa informa comunidad e preparacionnan pa diabierna awor 14 di october cu lo tuma luga un homenahe na e artista Arubiano conoci como Tali Wever.
Frank Williams, ken ta forma parti di e comision a expresa cu e evento ta bay ta na Cas di Cultura for di 8or di anochi unda tambe lo tin presente gruponan y artistanan local e cual nan ta bay duna un homenahe na un persona cu a pone e nomber di Aruba resalta na nivel internacional.
Nerio Italo Wever miho conoci como “Tali” a nace dia 8 di augustus di aña 1939, el a cuminsa su carera artistico cu 12 aña ora el a descubri e sentimento pa canto, su prome guitara a wordo cumpra na Pascual Albertus ken a bend’e pa 25 florin y e mester a pag’e 5 florin pa siman pa asina cuminsa siña e prome 3 accordnan.
Dunando serenata y coriendo parando cu su amigonan ron di Aruba Tali a duna di conoce su mes den epoca di Pasco y Aña nobo.
Den transcurso di tempo el a traha na hotelnan unda el a topa cu diferente musico y a conforma un trio cu Harold Hopmans y Boy Acosta tocante ranchera, tango, bolero y wals den diferente idioma, despues el a haya e oferta di Robby Schouten pa canta tango so na Tele-Curacao.
Tali a yega di biaha pa Puerto Rico, Corsou, Merca unda el a haya un contract pa cinco aña, despues Canada, Venezuela, Colombia y Antias, actualmente e ta haci su presentacionnan na hotel y na diferente restaurantnan riba invitacion.
Ta p’esey nan a considera necesario conforma un comision yama “Semper Tali” casi tres aña pasa pa cuminsa organisa un homenahe grandi, Williams a bisa cu e ta conoce Tali for di ora nan tabata chikito y ora nan a bira grandi nan a conforma un grupo di canto.
“Mi ta haya cu Tali merece un reconocemento p’esey mi ta coopera formando parti di e comision pa nos duna e homenahe na un artista cu tin mas cu 65 aña ta canta, toca y duna serenata cu su guitara”, Williams a expresa.
Persey Jeandor cu tambe ta forma parti di e comision a bisa cu Tali ta un persona hopi conoci na varios pais “tur artista ta merece un aplauso y esey nos tin cu duna Tali 14 di october awor den Cas di Cultura pa 8or di anochi, nos tin cu duna un homenahe awor cu e ta na bida” el a comenta.
Pa e anochi aki lo tin presente invitadonan special como Milo Muyale y su harpa, Mariachi Perla di Aruba, Jaydiene Croes, Duo Oro, Soledad Rijna, Coro La Escala, Ronny Kock Eddy Samson & Taly, entre otronan.
Pa personanan interesa di haya un carchi, por haya nan na Cas di Cultura, Djispie’s, The Old Cunucu House Restaurant, Boutique Keyla y Zeerovers.
