Den fin di siman, departamento tecnico di Elmar a wordo confronta cu un total di shete dalmento di auto riba palonan di luz. E accidentenan aki a causa interupcion den diferente bario.
Tecniconan consciente di e inconveniencia cu interupcion imprevisto di coriente ta causa den oranan di anochi of marduga, a percura pa suministra coriente mas pronto posibel na e areanan afecta door di e accidentenan aki.
Diasabra dia 31 di augustus pa mas o menos 2:00am a drenta e prome melding di un accidente contra un palo di luz na Noord, den area di Imeldahof.
Pa mas o menos 4:30am a drenta un otro melding, cu un auto a accidenta den area di Pavia contra un palo di luz.
Un rato despues, pa mas o menos 4:45am a drenta un melding cu den area di Kamerlingh Onnestraat varios cas no tin coriente. A resulta cu ta un otro accidente entre un auto y un palo di luz.
Ta sigui un melding pa mas o menos 5:00am den Caya Dick Cooper, area Watertoren na San Nicolas, un otro auto a accidenta contra un palo di luz.
Diasabra a bira un warda largo pa departamento tecnico di Elmar. Algun ora despues, pa mas o menos 11:15am, un auto a accidenta contra un palo di luz den area di House of Cheng.
Pa mas o menos 11:55am den area di Meiveld un auto a accidenta contra un otro palo di lus.
Diadomingo mainta, prome di september pa mas o menos 5:45am, Elmar ta ricibi un otro melding, cu un auto a accidenta contra un palo di luz.
Elmar kier enfatisa na tur automobilista pa sea consciente y pone mas atencion ariba caminda. Un accidente na un palo di luz ta conduci na debe y por tin consecuencia lamentabel.
