Consul di Colombia, sra. Mirza Gnecco a participa den e reunion cu e instancia encarga di promove Colombia internacionalmente, esta ProColombia, a organisa cu cuater instituto di salud di Medellin pa Aruba.
E diplomatico a expresa cu hopi ciudadano Hulandes cu ta desea di registra cu un EPS (Entidad Prestadora di Salud) y adkiri servicio di salud pre-paga, a confronta inconveniente. Mayoria di caso tin di haber cu Colombiano mes cu mester a renuncia na nan nacionalidad Colombiano, pasobra awor nan tin nacionalidad Hulandes. Pero tambe ta e caso di ciudadano Hulandes cu lo desea di adkiri e servicio pa medio di instancianan di salud Colombiano cu cay bou un EPS.
EPS y visa di stranheria
Consul Colombia a laga sa na e director di ProColombia sector Caribe, sr. Carlos Gonzalez cu e EPS na Colombia no ta permiti cu ciudadano stranhero lo por afilia na dje. Sinembargo pa medio di un visa esaki ta posibel y esaki ta e tipo di solicitud di visa cu nan ta ricibiendo den nan Consulado.
“Hopi di nan ta bin cerca nos pa solicita un visa pa asina nan por adkiri e cedula di estranheria y afilia nan mes na e EPS, ya cu e meta final ta esun di keda afilia na un instancia di salud pre-paga”, asina e diplomatico a declara.
Un inkietud cu a wordo aclara durante e reunion aki cu e clinicanan di Medellin cu a participa den e delegacion cu a bin Aruba, si nan ta atende ciudadanonan stranhero of di otro nacionalidad no Colombiano cu ta afilia na e EPS. E representantenan di e cuater clinica prestigioso di Medellin a bisa cu esaki si ta posibel, nos ta papiando di e clinicanan: Las Vegas, San Vicente Fundacion, Las Americas y Hospital Juan Pablo Tobon Uribe. Nan a informa cu nan ta atende afiliadonan na EPS, servicio pre-pago; polisa seguro internacional y pashentnan particular. Nan ta atende pashentnan bou tur aspecto di siguridad social.
E diplomatico Colombiano a trece e punto aki dilanti ya cu un parti di nos poblacion eventualmente no tin e posibilidad pa bay busca servicio di salud particular caminda nan tin cu paga directamente.
Polisa di seguro faborabel
Sra. Ana Maria Moreno di San Vicente Fundacion a bisa cu e no sa si na Aruba ta existi, pero den otro isla di nos region, manera Republica Dominicana y Trinidad and Tobago, tin agencia di seguro cu ta ofrece polisa internacional na un prijs accesibel compara cu esunnan cu ta cubri tratamento na Merca.
E ta haya cu eventualmente esaki ta un opcion cu e mercado di agencia di seguro ta ofreciendo den nos region Caribe. E poblacion cu tin un entrada grandi ta beneficia di e tipo di polisa aki pa haya atencion medico na Latino America. “Nan ta polisa miho den termino di costo cu e polisa internacional di Merca”, sra. Moreno a bisa.
