Despues di 40 aña Aruba tin un instancia cu ta bay encarga cu e cuido mental en general riba nos isla, esta Fundacion Geestelijke Gezondheidszorg (GGZ) Aruba. Bon Dia Aruba ta puntra minister di Salud Publico actual dicon e tardansa. ‘Burocracia y cambio di gobierno’ ta trece cu e tipo di cosnan aki no ta desaroya hopi lihe, segun e mandatario.

Minister Alex Schwengle ta conta nos tambe cu tabata tin un fundacion caba cu a wordo lanta algun tempo atras pero nunca nan a formalisa y a haya un bida. “Si bo lesa e documentonan di Geestelijke Gezondheidszorg na Aruba, bo ta wak cu tin como 40 aña caba documentonan señalando cu mester bin un instancia pa guia y organisa henter e cuido mental aki na Aruba.”
Burocracia
E ta sigui splica cu ‘si parti di bo organisacion di cuido mental di Aruba ta den man di gobierno, tin hopi burocracia y cosnan ta tarda hopi’. “Pues mehoransa hopi biaha ta tarda pa bini. Y pa colmo si un gobierno bolter den 2 of 4 aña, si e maneho bolter 180 grado, diripiente tur cos a para atrobe pa reorganisa. Esakinan ta trece hopi biaha tardansa innecesario. Bo ta crea hopi confusion y frustracion den e veld tambe, esey ta algo riparabel. E veld tin hopi bon hende den dje cu bon curason y profesionalismo. Pero tin hopi frustracion tambe di añanan. Mi ta sigur compronde esey.”
Mas eficiente
E minister ta bisa nos cu e ta pensa cu nunca esaki a wordo formalisa mas prome pasobra nos na Aruba ta custumbra di traha manera ‘islanan chikito’. “Bo tin PAAZ traha un caminda, SPD otro caminda, verslavingszorg otro banda. E veld ta traha semper hunto pero riba e nivel di directiva nunca nan no a comunica suficiente den un manera of otro pa yega asina leu di bisa pa bini hunto y organis’e hopi mas eficiente.” E meta pa haci esaki via Geestelijke Gezondheidszorg segun minister Schwengle ta, pa haci e trabao mas eficiente. Pa percura pa e liñanan ta mas cortico y pa e placa wordo uza mas miho posibel.

Cuido mental
Awor e diferente cuido ta cay bou di diferente instancia, segun e minister. E cuido ambulante ta bou SPD/Departamento di Saludo. PAAZ ta ofrece cuido pa un periodo mas cu 24ora. Y tin cuido pa adictonan cu ta cay bou departamento di Husticia. Minister Schwengle ta haya cu e cuido pa adictonan tambe mester cay bou e fundacion di Geestelijke Gezondheidszorg, y pa cu esaki su colega minister di Husticia ta riba mesun liña, segun e.

‘Hopi necesidad’ di cuido mental
E fundacion di famia Ling sigur a hunga un bunita rol pa lanta e fundacion, segun minister Schwengle, cu un bon push pa bin cu e cuido aki na Aruba. “E necesidad ta no ta cos di papia mes. Tin hopi necesidad pa haci e.” Nan a lanta e fundacion cual a wordo activa; cu conseho di supervision y lo tin un directiva. E Conseho forma aworaki lo percura pa henter e organisacion wordo lanta, segun e minister. Nan tin di aworaki cu fin di aña pa lanta e organisacion; traha un organogram, skirbi tur documento etc. Pronto mester percura tambe pa PAAZ bin mas lihe bao di e fundacion GGZ “Esey no ta bay facil. Nos a papia y informa e personal di PAAZ caba y tambe ABV (sindicato di enfermeria), tambe SPD. Nos a bisa nan cu nos no ta bay tuma ningun decision sin informa nan.”

Plan di implementacion
E conseho di supervision awo mester duna claridad riba con e ta bay funciona y na mesun trayecto = cuminsa traha un plan di implementacion hunto cu PAAZ, hospital y AZV, asina e minister ta conta. Nan a informa e empleadonan di PAAZ caba cu nan no mester preocupa cu nan posicion di derecho. “Si nan bay, nan lo tin un CAO nobo cu no lo ta menos di loke nan tin. Por ta e ta bay ta otro, mas moderno etc. Esaki ta depende con e negociacion bay, pero en principio mi no ta mira un problema. Den bisa cu minimo nan ta bay horizontal over. Nan no ta bay perde ningun derecho.”

Team special pa cuido ambulante
Claro segun e minister tin algun otro aspecto cu mester papia di dje over di pensioen of cantidad di experiencia anto con lo bay trata cu e otro detayenan aki. Gobierno ta spera di por haci tur esey mas lihe posibel segun sr. Schwengle: “Pasobra den transcurso di otro aña PAAZ por bay bou GGZ y por cuminsa cu loke nos ta yama un ambulatoire team. Nos kier cuminsa cu un na Playa prome of San Nicolas pasobra nos kier dos, cuminsando cu cua cu ta prome y despues bay pa e otro. E accento ta bay ta basta pisa den e parti ambulatorio pasobra hopi problema ta cuminsa na un edad hopi jong.” E mandatario ta sigui splica Bon Dia cu si bo por detecta e problema na un edad mas jong, ta logra resolve esaki hopi biaha. Si no haci esaki na jong, e problema ta sigui crece y bira cronico cual ta hopi biaha mas dificil pa resolve.
Fasenan di traslado
Seguro nacional di cuido AZV lo cera un contracto di cuido cu e fundacion GGZ. E prome fase ta pa PAAZ bay bou GGZ. Despues nan kier lanta e teamnan special y wak con SPD lo fit den esaki. Fase tres ta encera e cuido pa adictonan. Minister Schwengle: “E ta bay gradualmente. E ta un proceso anto e veld den general ta para tras di e idea. Nan ta kere cu reorganisando den e manera aki ta bay trece mas trankilidad y miho cuido di nos problemanan mental aki na Aruba. ”
E mandatario ta conclui cu teoreticamente pa 1 januari 2018 sea temporalmente of definitivamente nan kier tur cos ta cla. Of cu entrante di 1 januari 2018 lo haci e traspaso temporalmente unda ainda tin espacio pa negosha. Pero nan kier pusha pa otro aña pasobra experiencia ta bisa tambe cu no por tarda di mas. “Nos ta spera asina e ta miho organisa cual mi ta kere lo bira tambe mas interesante pa e trahadonan. Pasobra ta bay tin mas flexibilidad unda cu por ta pa un par di luna bo ta traha clinicamente y djey bo kier traha poli clinicamente. Pues por tin tiki mas variedad eynan den e trabao.”