(Curacao.nu) – Biodiversidad di tiburon rond Corsou a baha drasticamente den decadanan reciente. Esaki ta bisto for di un estudio cientifico di entre otro Lisa Hübner y Guido Leurs, publica dia 5 di juni 2025, den e revista Aquatic Conservation. E investigacion, basa riba conocemento ecologico local di piscador, ta mustra cu e cantidad di areanan cu diversidad halto di tiburon – asina yama hotspots – a baha cu mas cu 60 porciento for di 2010.
Entre 1957 y 2009, piscadornan a identifica 36 hotspot cu un diversidad di especie promedio di mas cu shete especie di tiburon pa area. Entre 2010 y 2022, e cantidad ey a baha te na 14 hotspot, caminda un promedio di tres especie ta ser haya. E probabilidad cu un hotspot lo a sosode den pasado tabata mas cu cuater biaha mas grandi cu e ta awor.
E estudio tabata basa riba 21 entrevista y encuesta bou di piscador local, cu a mapa nan observacionnan di tiburon den henter Corsou. Segun e investigadornan, e resultadonan ta mustra cu conocemento local ta valioso den reconstruccion di tendencianan ecologico den regionnan caminda datonan a largo plaso ta falta.
Bycatch
Aunke triburonnan no ta ser gara hopi na Corsou, hopi biaha nan ta ser tuma como bycatch (pisca gara pa eror). Segun piscadornan, esaki ta sosode generalmente pa evita daño na articulonan di pisca. Carni di tiburon tabata ser consumi frecuentemente den platonan manera keri keri, pero e tradicion aki a baha. No obstante, e carni, ta ser bendi regularmente ainda, tin biaha bou di e nomber di un otro especie di pisca, manera grouper. E benta di azeta di higra di tiburon tambe ta birando mas comun, debi na su supuesto propiedadnan medicinal.
Ta impresionante cu mayoria piscador ta apoya e importancia di conservacion di ocean pero ta considera proteccion di tiburon innecesario. Nan ta considera e poblacionnan como saludabel. Na mesun momento e gran mayoria di piscadornan no ta sinti nan mes envolvi den maneho di pisca riba e isla. Sinembargo, casi tur participante a indica cu nan lo kier ta mas envolvi den tumamento di decision pa loke ta trata maneho di pisca.
E investigacion a ser financia pa e Academia Real di Arte y Ciencia di Hulanda, Sharkproject Internacional, y e Fundacion Aleman pa conservacion di Marino (Deutsche Stiftung Meeresschutz). Tur piscador participante a ser informa tocante e resultadonan prome cu publicacion a traves di poster y flyer na e lugarnan di pisca local.
