Hubert Tiel: 55 aña creando historia a traves di fotografia

Hubert Tiel no ta un nomber desconoci den e mundo di fotografia. Cu 55 aña di experiencia, Hubert ta conta di su trayectorio den fotografia, con el a cuminsa, con e arte di fotografia a desaroya y ta duna su tips y mensahe pa futuro fotografonan di Aruba.

E aña aki Hubert a cumpli 55 aña den e mundo di fotografia. Dia18 di augustus, dia di su cumpleaño, su pasion pa fotografia a cuminsa na momento cu pa su di 11 cumpleaño su mama a regal’e un camara chikito. E tempo ey tabata, el a sigui conta, e camara tabata di rol di 12 y tabata saca potret blanco cu preto.

El a conta cu e idea tabata pa e saca potret di e muchanan di bario cu a bin pa canta happy birthday p’e, pero esey no tabata e caso pasobra ora el a haya e camara el a cuminsa saca potret di cosnan, manera cadushi, lagadishi, cosnan cu tabata move y un rol di 12 tabata caba super lihe. Pero asina mes un di e miho potretnan cu el a saca e dia ey tabata di su mama.

El a splica cu despues poco poco cu tempo su habilidadnan pa saca potret tabata progresa. Y e tabata bay les di saca potret y tambe e tabata siña con pa laba potret blanco cu preto.

Despues di varios aña, ora e tabatin 18, Hubert a cumpra oficialmente su prome camara un tiki mas sofistica y despues cu su 19 aña el a cumpra su prome camara Nikon, y desde e tempo ey el a keda usa e mesun marca di camara, te dia di awe.

Un di Hubert di otro pasionnan tabata motorsport y hunto cu pasion pa saca potret el a crea e combinacion perfecto. Pero no obstante e tabatin hopi contratiempo cune pasobra e sa e shot cu e ta busca y e angulo cu mester, pero na Palomarga e tempo ey e tabata haya problema cu e grupo cu tabata traha pa por a yega na unda mester ta pa haya e shot perfecto.

“Como fotografo bo sa kico bo ta buscando, kico ta e angulo, kico ta bo limite, y bo ta buscando algo cu no ta mescos cu tur hende. Mi ta corda tabatin un biaha nan a hala mi atencion pasobra mi tabata usando flash pasobra mi ta stroba e driver. Pero asina bo ta haya bunita potret pasobra bo ta haya full e auto, pero e driver den dje tambe haciendo su trabou,” el a expresa.

Apart di saca potret, Hubert tambe a siña hopi hende riba Palomarga con pa busca e miho shot, algo cu ta haci’e hopi contento pasobra awendia e ta wak cu tin varios hende cu ta traha eynan cu tin shotnan hopi bunita mes.

Hubert a conta cu aunke saca potret di motorsport tabata su pasion mas grandi, el a cuminsa drenta poco poco den loke ta accidente, tur loke ta pasa rond tur dia, y asina mes tambe e tabata keda busca e manera di tin e miho angulo, e miho shot.

Tecnologia a avansa grandemente, y den e mundo di fotografia Hubert a biba esaki. El a splica cu awendia ya no tin preocupacion pa limite di cantidad di potret. Awendia cu chip e por saca 200 of 300 potret sin ningun problema.

Pero di otro banda tambe tecnologia a haci cu awendia hopi hende no ta interesa pa siña con pa saca fotografia mas. Hopi hende ta usa nan telefon y ta yega saca potret di schuin, con cu ta y asina e potret riba su mes ta perde su balor. Ademas cu awendia hopi ta publica potretnan di nan momentonan riba storianan y despues no ta corda mas ni kico nan ta y no por bay den filenan pa sa kico e ta. “Esey ta jammer pasobra bo tin asina hopi historia den un fotografia,” el a enfatisa.

Hubert a conta cu tabatin un tempo cu el a purba di bay over na camara pa graba pa un periodo di dos aña, pero e no a gusta pasobra den su pensamento ora e usa su camara di saca potret, e por dicidi ki ora e ta vries e momento y esey ta algo cu e no por haci cu camara di filma, e ta keda graba bay.

Cu 55 aña den e mundo di fotografia Hubert tin un archivo hopi grandi di potret, historia, recuerdonan warda. Recientemente el a haci di tur su material na Archivo Nacional Aruba, potret, documento y hasta su camaranan.

“Mi a hiba tur mi camaranan na ANA, tur mi badges, practicamente tur mi historia di 55 aña pa nan archiva esaki pa asina tambe nan por mustra hubentud con fotografia tabata y con leu el a yega awe,” el a indica.

Por ultimo, Hubert tin algun tips valioso pa hobennan cu ta desea di drenta den fotografia. “Nos ta saca potret di tur loke ta bin y tur loke ta bay. Pero mi conseho ta keda semper busca e angulo corecto, luz corecto, y posicion corecto. Wak e como arte, e mester keda semper un arte y lo keda den historia,” el a enfatisa.