Ayera mainta, e muhe hoben, C. Fernandes, sospechoso di e hit-and-run cu a tuma lugar diadomingo anochi laat cu a cobra bida di un pareha, a presenta dilanti Hues Comisario, ken a aproba e peticion di Ministerio Publico (OM) y a prolonga detencion di e sospechoso cu 14 dia adicional, mientras cu autoridadnan ta sigui cu nan investigacion. E noticia ta bini memey di critica y preocupacion publico creciente pa e situacion lamentable aki y e hecho cu autoridadnan a tarda pa revela identidad di e sospechoso.

E incidente tragico a sucede diadomingo marduga laat riba L.G. Smith Boulevard, banda di Wind Creek Casino na Aruba. Prome informe di polis a indica cu un SUV color scur a dal dos peaton — identifica como Josely Paulina Vasquez Gonzalez (naci 7 di juli 1960 na Republica Dominicana) y Carlos David Vialez Valerio (naci 19 di oktober 1971, tambe na Republica Dominicana) — prome cu e chauffeur a huy for di e sitio. Paramediconan despues a confirma cu ambos victima a fayece di nan heridanan prome cu nan por a ser transporta pa hospital.

Autoridadnan despues a confirma cu e SUV envolvi den e accidente a sigui core, y a ser localisa den e area di Bushiri na Oranjestad, unda polis a confisca e vehiculo y a detene e chauffeur sospechoso, un muhe hoben di 24 di aña.

E hecho cu inicialmente autoridadnan no a duna inicial di e sospechoso a duna espacio pa comunidad mes busca pa haya sa identidad di e chauffeur, loke a lanta un debate intenso riba rednan social. Rumornan a circula den e comunidad y varios plataforma social tocante e identidad di e chauffeur — incluyendo publicacionnan no verifica cu ta nombra un persona identifica como C. Fernandes. Rumornan cu tambe a circula tabata cu e chauffeur a ser laga den libertad.

Bon Dia Aruba a tuma contacto cu vocero di Ministerio Publico, Ann Angela, diamars y a manda pregunta pa trece claridad y evita mal informacion. Angela a informa cu e sospechoso ta deteni ainda y cu e mester a presenta dilanti Hues Comisario diahuebs (ayera),” caminda OM a pidi pa prolongacion di detencion, cual Hues Comisario a aproba.

E decision pa prolonga detencion di e sospechoso C. Fernandes cu 14 dia ta surgi for di e necesidad pa investigadornan sigui cu trabaonan forensico adicional, y otro colecta di evidencia prome cu acusacionnan formal sigui.

E incidente y su consecuencianan a lanta un debate fuerte den henter Aruba. Hopi habitante a bay riba rednan social mesora despues di e accidente y detencion, expresando shock, tristesa y rabia. Un punto primordial di critica tabata e hecho cu inicialmente autoridadnan no a revela e identidad di e sospechoso.

Ciudadanonan a cuestiona pakico polis of autoridadnan concerni, tampoco medionan di comunicacion local, no a revela identidad di e sospechoso, y si ta trata di algun tipo di trato special cu tabata duna e sospechoso y si tabata purba sconde su identidad.

Mientras cu Cuerpo Policial a indica cu a detene e sospechoso na Bushiri, y cu tabata trata di un chauffeur femenino, no a duna un inicial ni mas detaye. Esaki, combina cu e seriedad di e incidente, a pone cu comunidad local mes a cuminsa busca manera di haya sa identidad di e sospechoso.

Yiu di Vasquez Gonzalez, un di e victimanan, den su dolor a comparti un video riba rednan social den cual tabata exigi husticia pa e incidente. Sinembargo, den su estado emocional vulnerable el a haci algun menasa – cu despues el a hala atras. Despues el a comparti otro video riba rednan social pidiendo hende pa no punta dede, pero reiterando su yamado pa husticia. Tambe el a desmenti cu famia di e sospechoso a ofrece di paga gastonan di entiero di e victimanan, un detaye cu a keda reporta den medionan local, pero cu e yiu a bisa no ta berdad of al menos, e no a tende nada di esey na momento di publicacion di su video.

Ta conoci cu riba L.G. Smith Boulevard tin camara di seguridad y no a dura hopi prome cu video di un camara di seguridad cu a capta e momento cu e accidente a tuma luga a leak riba rednan social.

Den e video por mira con dos pareha, incluyendo e pareha cu a fayece, tabata crusando caya di manera corecto riba zebrapad, ora cu e auto, coriendo na un velocidad demasiado halto, a pasa dal e victimanan. Un pareha cu tabata compaña e victimanan a logra scapa di e golpi.

Mesora ciudadanonan a expresa nan rabia y frustracion tocante con e chauffeur tabata core, e velocidad extremadamente halto cu e auto tabata bin, ya cu den e video pa por mira e SUV ta pasa den un seconde y ta dal e victimanan.

E hit-and-run ta agrega na e ansiedad creciente tocante seguridad di trafico riba e isla. Den e ultimo añanan, Aruba a conoce multiple incidentenan fatal den trafico, loke a pone cu tin discusionnan tocante responsabilidad di chauffeur, ehecucion di leynan di caminda, y educacion di comunidad. Den un caso anterior di hit-and-run fatal den e area di Pos Chikito na december 2024, polis a haci un investigacion extenso cu a conduci na identificacion y aresto di un sospechoso — pero e caso ey tambe a provoca critica despues cu e sospechoso a keda den libertad prome cu su huicio, lantando preguntanan tocante e maneho di e sistema di husticia di crimennan severo den trafico.

Polis ta urgi chauffeurnan pa obedece limitenan di velocidad, keda alerta y informa cualkier accidente mesora, specialmente ora heridonan serio of morto sucede. E consecuencianan di e accidente mortal recien a bolbe rebiba e yamadonan aki, cu discusionnan ta surgi tocante si e reglanan di trafico y castigo di Aruba ta suficiente fuerte.

Cu e detencion di e sospechoso awor prolonga, e siguiente pasonan den e proceso hudicial lo enfoca riba compilacion y revision di evidencia continuo. Ta spera cu fiscalnan presenta resultadonan na corte segun cu nan ta prepara acusacionnan formal.

E perdida dobel di bida den e hit-and-run ta sigui resona den henter comunidad. Publicacionnan di conmemoracion, y yamadonan publico pa aumenta seguridad den trafico ta refleha e impacto emocional profundo di e tragedia.

Mientras tanto, residente y oficialnan mescos ta sigui debati con por preveni tragedianan similar den futuro — for di control y aplicacion di reglanan di seguridad di trafico te na iniciativanan di conscientisacion di comunidad.